ڕاپۆرت

تورکیا نەوتی هەرێم بۆ ئەوە دەبات تەنها دەسەڵاتی پارتیی بپارێزێت

شارەزایان و چاودێرانیی ئابووریی هەرێمی کوردستان رایدەگەیەنن، پارتیی وەک بڕیاردەری یەکەم بەرپرسی سەرەکیی شکستە ئابووریی و سیاسییەکانە، جەختیشدەکەنەوە: داهاتی حکومەتی هەرێم و بەرپرسانی هەرێم و کۆمپانیاکانیان ساڵانە زیاتر لە دوو سەد میلیارد دۆلارە

ئا: ئاسۆ جەوهەر

 

دەشڵێن: حکومەتی هەرێمی کوردستان پەیڕەو لە هیچ بنەمایەکی فیکریی سیاسیی ناکات، زۆری بەڕێوەبردنی سێکتەرەکان لەناویشیاندا ئابووریی، سەر بەهیچ کام لە قوتبخانە زانستییەکانی دونیا نییە.

حکومەتی هەرێمی کوردستان، بیانووی ئەوە دەهێنێتەوە کە بەهۆی بڵاوبوونەوەی ڤایرۆسی کۆرۆناوە، نرخی نەوت دابەزیوە و داهات کەمی کردوە ئەمە هیچ بنەمایەکی دروستی نییە، لە بازاڕ جیهانیی نەوتدا دوو جۆر گرێبەستی فرۆشتنی نەوت هەیە:-

جۆری گرێبەستی یەکەم: گرێبەستی ماوە کورت ئەو جۆرە گرؿبەستەیە کە نەوت رۆژانە دەفرۆشرێت، واتا نرخی فرۆشتن و کڕیینەکەی بە نرخی رۆژە و لە بازاڕی بۆرسەی جیهانییدا نرخی زیاد و کەم دەخرێتە روو، ئەم جۆرە گرێبەستە بە هیچ شێوەیەک هەرێمی کوردستان ناگرێتەوە .

جۆری گرێبەستی دووەم: گرێ بەستی ماوە درێژە، وڵاتێک لەگەڵ کۆمپانیایەکی دەرههێنای نەوت بۆ ماوەی درێژ لە یەک مانگەوە بۆ ٥٠ ساڵ و زیاتریش بڕ دەکات و بە نرخێک رێک دەکەون کە لەسەروو بڕی پارەی تێچووی دەرهێنانی نەوەتەکەوەیە بڕێک دیاری دەکرێت؛ ئەمجۆرە گرێبەستە ئەو وڵاتانە دەگرێتەوە کە ڕاستەوخۆ توانای هەناردەکردنی نەوتیان نییە.

نزیکەی لە %٨٠ گرێبەستەکانی حکومەتی هەرێمی کوردستانیش لە جۆری دووەمە و لەگەڵ هەر یەک لە کۆمپانیاکانی: روسنفتی روسیی کە بۆ ماوەی ٥٠ ساڵ، گرێ بەستی دانەگاز کە بۆ ماوەی ٢٥ ساڵ، گرێ بەستی جەیهانی تورکیی کە بۆ ماوەی ٣٢ ساڵ.

 

مستەفا، رۆژنامەنووسێکی گەنجی هەرێمی کوردستانە، ئاماژە بە گرێبەستی نەوتی حکومەتی هەرێم لەگەڵ  تورکیا دەکات و دەڵێت: لەروی سیاسیی بێت یان ئابووریی، ئەمەیش دەری دەخات کە ئەم گرێ بەستە، بەتوندیی هەرێمی کردوەتە کۆیلە و شوێنکەوتەی ئابووریی و سیاسیی تورکیا. پێدەچێت ئەم گرێبەستە بۆ ماوەیەکی درێژتر نەوەکانی ئەم گەلە گیرۆدە بکات،  بەتایبەت کە حکومەتی هەرێم نەتوانێت پەیوەندیەکی توندو تۆڵی هاوسەنگ و شەفاف لەگەڵ بەغداد ببەستێت، من وای بۆ دەچم دەربازکردنی هەرێم لە کێشەی ئەو گرێبەستە، تەنیا دەروازەکەی بەغدادە.

مستەفا شێخ محەمەد
مستەفا شێخ محەمەد، رۆژنامەنووس

مستەفا شێخ محەمەد، رۆژنامەنووس، بە ئازادیی کۆمەڵگەی راگەیاند: هەر کەس و ناوەندێکی ئابووریی، لێکۆڵینەوەیەکی  ورد بکات، بەئاسانیی بۆی دەر دەکەوێت، لەهەرێمی کوردستان هیچ شتێک نییە، بەناوی سیاسەتێکی ئابووریی، بەمانا ستراتیجیەکەی، بەڵکو ئەوەی هەیە، کۆمەڵێک ناوەندی کۆکردنەوەی داهات و دابەشکردنەوەیەتی بەسەر کۆمەڵێک ناوەندی تردا، ئەم پڕۆسەیەش پڕۆسەیەکی سادەی ئابوورییە،  ئەو شتەی ناویان نابوو”ئابووریی سەربەخۆ” لە ڕاستییدا  پڕۆسەی هەڕاجکردنی نەوتی هەرێمی کوردستان بوو، بۆ کۆمەڵێک کۆمپانیا، کە ئەمەشیان روبەروی شکستێکی  پشتشکێن بوویەوە، بەتایبەت ئەو کاتەی کۆمەڵێک لە کۆمپانیا  گەورەکان پشتیان لە نەوتی هەرێم کرد.”

ئاماژە بۆ ئەوەشدەکات: هەڵسەنگاندن بۆ دۆخی ئابووریی هەر وڵاتێک  بەتوندی بەگەشەی ئابووریی و جۆراوجۆریەتی سەرچاوەکانی گرێدراوە،  دەبێت خشتەی هەر کەرتێکی ئابووریی جوڵەکانی لە روی ژمارەیی، وەبەرهێنان و بەبازڕکردنەوە دیاربێت. هەر بۆیە کۆی سێکتەرە ئابوورییەکانی هەرێمی کوردستان، لە ئاستێکی لاواز دان، ناتوانن بەشداریی بکەن لە کەشەپێدانی ئابووریی، تۆ سەیری کشتوکاڵ بکە، چەند کەس لەکوردستان لەم بوارە کاردەکەن، داهاتیان چەند؟ ئەم پرسیارە سەبارەت بە کەرتەکانی تریش هەر راستە، ئایا پیشەسازیی و گەشتووگوزار  چ داهاتێکیان هەیە؟ کاتێک وەڵامی ئەو پرسیارانە نادیارە کەواتە بەسادەیی ئێمە لەم هەرێمە سیستەمێکی ئابووریی داڕوخاومان هەیە، ئەمانەیش هۆکاری سەرەکیین.

 ناوبراو، جەختدەکاتەوە: هەمیشە ئەو ئابوورییانەی پشت بەتاکە سەرچاوەیەک  بۆ دەرامەتی نیشتیمانیی دەبەستن، ئابووریی لەرزۆک و فشۆڵن، ناتوانن روبەروی بچوکتریین قەیرانن ببنەوە،  دەتوانین نمونەی ئێران وەک وڵاتێک کە خاوەنی ئابوورییەکی تا ئەندازەیەکی زۆر پشتبەخۆبەست و هەمەجۆرە ببینین کەسەرە رای گەمارۆکانی سەری بەتەواوەتیی پەکی نەکەوتووە،  هەروەها ئابووریی قەتەر بەنمونە وەرگرین کە کاتێک لە ساڵی ٢٠١٥ روبەروی گەمارۆبوویەوە، قەتەرییەکان بۆیان دەرکەوت، کە سەرەڕای بەهێزی دراوەکەیان و زۆری سامانەکەیان، لەچ کێشەیەکی گەورەدانە، بۆیە هەوڵی  جۆراوجۆریەتی ئابووریی خۆیانداوە، بەڵام لە هەرێمی کوردستان حەوت ساڵی رەبەقە ئێمە لەناو قەیرانێکی ئابووریی  پڕ لە زەحمەتی داین، بەڵام حکومەتی هەرێم نەک هەر هەنگاوی بۆ چارەسەری کێشە ئابوورییەکانی نەناوە، تەنانەت بییریشی لێنەکردوەتەوە، حکومەتی هەرێم هێندەی چاوەڕوانی بەرزبونەوەی نرخی نەوت و هاتنی پارەی بەغدادە، هێندە بییر لە چارەسەرەی کێشە ئابوورییەکانی ناکاتەوە.

ئەو رۆژنامەنووسە، هێما بۆ ئەوەشدەکات کە هەر شتێک بنەمایەکی دروست و پتەوی نەبێت، ئاسان دا دەڕمێت، “با نمونەیەکی واقیعی بێنینەوە، ئایا حکومەتی هەرێم لەسەر بنەمای چ رێبازێکی فیکریی و سیاسیی پێگە سیاسیی و ئابوورییەکانی داڕشتوە، قسەی زۆر دەکرێت، بەڵام کاتێک لە ناوەڕۆک و جەوهەرییان بکۆڵینەوە، بە ئاشکرا دیارە، کە حکومەت پەیڕەو لە هیچ بنەمایەکی فیکریی سیاسیی ناکات، زۆری بەڕێوەبردنی سێکتەرەکان لەناویشیاندا ئابووریی، سەر بەهیچ کام لە قوتبخانە زانستییەکانی دونیا نییە، ئەوەی لەحکومەتی هەرێم دەبینرێت، شتێکی زیاتر نمایشی و شکڵییە، لە ژێر ناوی حکومەتداری، ئەوەی لێرە دەگوزەرێت  بەرێوەبردنی سیاسەتێکی حزبیانەی خێڵەکی دواکەوتووە، لە پاڵ ناوی حکومەتی هەرێم کۆمەڵێک گروپی حزبیی چالاکییە ئابوورییەکان بە خواستی خۆیان دادەڕێژن، ئەم لاوازییەی حکومەت وایکردوە، کە هیچ جۆرە پێشوەچونێکی کردەنی بۆچارەسەریی کێشەکان نییە.”

لەوەش دەدوێت، کە :حکومەتی هەرێم پشتی بەهیچ لێکۆڵینەوەیەکی زانکۆکان نەبەستوە بۆ دارشتنی سیاسەتی ئابووریی، ئەمەش دەرخەری ئەو باسکە ئەستورە حزبیەیە کە حکومەت هەڵ دەسوڕێنێت، کەواتە حکومەت رۆڵێکی لاوازی هەیە لە قەیرانەکان، کارەکتەر و بنەماڵە و هێزە حزبییەکان شتەکان ئاڕاستە دەکەن.

ئەو رۆژنامەنووسە، راشیگەیاند: لە راستییدا باشوری کوردستان ئۆپشنی زۆری بۆ مناوەراتی سیاسیی نییە، کەمتر دەتوانێت بێ رەزامەندی تورکیا و ئێران جوڵەی سیاسیی بکات، بەتایبەت کە هەرێمی کوردستان نەیتوانی دوای روخانی رژێمەکەی سەدام حسێن پەیوەندیەکی دروست  لەگەڵ بەغداد رێکخاتەوە، لە کوردستان کۆمەڵێک سیاسی لەبری ئەوەی بەغدا وەک قوڵای ستراتیجی هەرێم سەیر بکەن، دەستیان بۆ دژایەتی بەغدا برد و خۆیان لە پشت  کۆمەڵێک دروشمی بەتاڵی کوردایەتی شاردەوە، ئەمەش وایکرد، متمانەی عێراق لە دەست بدەن، تورکیاش ئەم هەلەی قۆستەوە، فراوانتر  پەلو پۆی هاویشت تاکو وای لێهات ئەم هەرێمە بخاتە ژێر رکڤی خۆی، ئەمەش کۆمەڵێک کارن کە وای کردوە، کێشەی ئابووریی هەرێم بەهۆی کۆمەڵێک هەڵەی ستراتیجیە، کە دەتوانین لە دوو خانەی سیاسەتی ناوخۆی و سیاسەتی دەرەکیی پۆلێنیان بکەین، سەبارەت بە سیاسەتی ئابووریی لەناوخۆدا،  حزب لە پێناو  کرینی ئینتیمای سیاسی پەنای بۆ دامەزراندن و  گەشەپێدانی کەرتی سەربازی برد، هەروەها کەرتەخۆژیێنەکانی بەخێرای لە گەڵ هەڵرژانی پارەی عێراق بەخێرای پوکانەوە، خاوەن پیشە کشتوکاڵیەکان رویان لە پیشەکەیانوەرگێرا و دامەزران و کەرتەکە بەخێرای پوکایەوە، گوندەکان چۆڵکران و باڵەخانەکان لە شارەکان بەرزکرانەوە، بێ ئەوەی ناوەندی پیشە سازی و تێدا دامەزرێن، ئەمش وایکرد هەرێم بەتەواوەتی ببێتە بەکاربەر.

دەشڵێت: لە ئاستی دەرەکیشدا، هەرێمی  لە پێناو رەزایەتیی دەوڵەتانی ناوچەکە بەتایبەتی تورکیا،  بۆ ئەوەی هەرێم ببێتە بازاڕێک کاریگەریی دروست بکات، بەلێشاو داوەتی کۆمپانیا بیانیەکانی کرد، کار ئاسانی زۆری بۆ کردن، ئەمەش وای کرد، زۆربەی هێزی خۆی لەم پڕۆسەیەدا لە دەست بدات، ئەمە سەرباری هەبوونی پەیوەندی خراپی هەرێم و بەغداد، کە زۆرجار ئەم پەیوەندیانە لە پێناو بە بەبازاڕکردنی ناوخۆیی و بۆ بەرژەوەندی حزبی  تێک دەدران.

مستەفا شێخ محەمەد، راشیدەگەیەنێت: ئەگەر هەرێمی کوردستان بیەوێت لەم دۆخە ئاڵۆزە ئابووریی و سیاسییە کە ئێستا توشی بووە دەربازی بێت، یەکەم هەنگاو ئەوەیە دەبێت ددان بە شکستی خۆی دابنێت، ئینجا دەست بۆ پرۆسەکانی چارەسەریی ببات، هەر هێزێک نەتوانێت دان بەشکستەکانی دابنێت، ئەگەرەکانی چارەسەری کێشەکانیش دور دەخاتەوە، هەر هەنگاوێکیش لەم دۆخەدا دەکرێت، زیاتر ئاڵۆزی لێبکەوێتەوە، پشێوییە ئابوورییەکان زیاتر بکات، وەک ئەوەی دوای 2014 بینیمان کێشەکان بەقوڵتر لە 2020 دەر ئەکەون، لە دۆخێکی بەو شێوەیەدا،؟کە ئێمە 29 ساڵ نەمان توانیوە، هێزی بەرکری ناوەخۆی دروست بکەینو شکستمان هێناوە، لە بەرێوەبردن، ناکرێت هیچ خاوەنێکی ئەوشکستە نەبینین، بۆیە  ئەمڕۆ پارتیی وەک بڕیاردەری یەکەم بەرپرسی  سەرەکی شکستەکانە، لەدوای ئەویش هێز و لایەن و کەسایەتیەکانی دیکە بەرپرسیاریەتیان بەر دەکەوێت.

یاسین عەلی
یاسین عەلی، نووسەر، ئەندامی دەستەی کارگێڕیی یەکێتیی خاوەنکارانی کوردستان، ئەندامی یەکێتیی بەڵێندەرانی کوردستان

یاسین عەلی، نووسەر، ئەندامی دەستەی کارگێڕیی یەکێتیی خاوەنکارانی کوردستان، ئەندامی یەکێتیی بەڵێندەرانی کوردستان بە گۆڤاری ئازادیی کۆمەڵگەی راگەیاند: ناکرێت باس لەبوونی سیاسەتی ئابووریی ھەرێم بکرێت، چونکە ھیچ سەرەداوێک نییە ئەوە پشتڕاست بکاتەوە، ئەوەشی کەباس لە داڕمانی ئابووری کوردستان دەکرێت، ناکرێت وا نیشان بدرێت و بەو شێوەیە ھەڵسەنگاندنی بۆ بکەین، لە ڕاستیی و لە واقیعیدا ئابووریی ھەرێم و عێراق بەھێزە، ئەوەی ئێستاش وەک کێشەو ئاریشە باسی لێوەدەکرێ دۆخی دارایی و کارگێڕیی و خراپی ئیدارەیە؛ وەکوتر ھەرێم و عێراقیش داھاتەکانیان زۆر زیاترە لە پێداویستیەکانیان .

ئاماژە بۆ ئەوەشدەکات، رۆڵی حکومەت لەو قەیران و تەنگژانە سەرەکیی یە، چونکە حکومەت لەسەر بنچینەی کارو فەرمان وەزیفەو مووچەخۆرانی دانەمەزراندوە..؟ حکومەت و دارایی دەوڵەت بەبێ بنەمای ئەرک و مافەکان بەڕێوەدەبرێ ، ئەمەش بە تەنیا بەسە بۆ ئەوەی کەداھات و دەوڵەمەندی وڵات ھەرچەندە زۆر بێت ، بەھەدەر دەڕوات .

ئەو لایوایە شتێک نییە بە ناوی ڕێککەوتنی ٥٠ ساڵەی فرۆشتنی نەوتی حکومەتی هەرێم بە تورکیا، “من لای خۆمەوە شتێک نییە ئەوە وەک رێککەوتن پشتڕاست بکاتەوە، ھەروەک چۆن ناشتوانین بەدرۆ بخرێتەوە، ئەوەی ھەیە بردنی نەوتە بەرانبەر پاراستن و پشتگیریی سەربازیی ئەم دەسەڵاتە، چونکە دەسەڵات لە لایەک لەناوخۆدا ناکۆکیان ھەیە و لە لایەکی ترەوە زۆربەی کات لەگەڵ دەوڵەتی ناوەندیی عێراقیش بەکاریان دەھێنن، جگە لەوەی لەگەڵ خواستەکانی جەماوەریش ناکۆکیی زۆریان ھەیە.”

باس لەوەشدە کات، لێرە ناکرێت سیاسەت بکەیت و ئیدارەو بەڕێوەبردنێکت ھەبێت، بێ بوونی ھێزێكی سەربازیی تۆکمەو سەربەخۆ..؟ بێگومان ئەگەر خۆت ئەوەت نەبێ ئەوا یان دەبێ نەمێنی یان دەبێ بەداواکارییەکانی خاوەن ھێزەکانی ناوچەکە رازی بیت و ملکەچەیان بیت .دەسەڵاتی ھەرێم و حزبەکانی نەیانتوانیوە ئەو ھێزە توکمەو سەربەخۆیە بنیات بنێنن و ھەر ئەوەش ئەرکە گرنگ و چارەنووس سازەکەیە .

ئەو، ئەندامەی دەستەی کارگێڕیی یەکێتیی خاوەنکارانی کوردستان، راشیگەیاند: ئەمە ڕاستی دۆخی دارایی و گوزەرانی خەڵکی ھەرێمەکەیە، لەھەر ڕووداو گۆڕانکاریەک توانای بەرگەگرتن و خۆڕاگری زۆر لاوازە، ناکرێت کۆی کێشەو ئاریشەکان بە فاکتەری دەرەکیی و لاوەکییەوە گرێ بدەین، نەبوونی کارامەیی و لێھاتوویی و بەگەڕ نەخستنی توانا مرۆییەکانی خۆمان فاکتەری سەرەکیی یە.

چاودێرانی ئابووریی هەرێمی کوردستان، ئەوە ئاشکرادەکەن ئەو داهاتەی ساڵانە حکومەتی هەرێم و کۆپانیاکانی بەرپرسانی هەرێم لە ناوخۆ و دەرەوەی هەرێمی کوردستان بەدەستی دەهێنن زیاتر لە دوو سەد میلیارد دۆلارە.

زانکۆ ناصر ئەحمەد
زانکۆ ناصر ئەحمەد، نووسەر

زانکۆ ناصر ئەحمەد، نووسەر، بە داتاو زانیاریی ورد کە پشتی بەستووە بە سەرچاوەی جیهانیی و ناوخۆیی، داهاتی هەرێمی کوردستان لە ناوخۆ و دەرەوە بۆ گۆڤاری ئازادیی کۆمەڵگە ئاشکرادەکات: رێژەی یەدەگی نەوتی هەرێمی کوردستان بەگوێرەی راپۆرتی وەزارەتی سامانە سرووشتییەکان لە ساڵی ٢٠١٦ هەرێم خاوەنی ٤٥ میلیارد بەرمیل نەوتی یەدەگە، لە هەمان کات خاوەنی ١٧٧ تریلیۆن مەتر سێجا گازی سرووشتییە، ئەگەر یەک بەرمیل نەوت بە ٢٥ دۆلار بفرۆشێت ئەوا داهاتی هەرێم دەکاتە ئەم ژمارەیە (١.١٢٥.٠٠٠.٠٠٠.٠٠٠) یەک تریلیۆن و سەد و بیست و پێنج میلیارد دۆلار تەنها داهاتی نەوتە لە کاتێکدا گەر گازە سرووشتییەکە بفرۆشێت کە نرخی یەک مەتر سێجا لە بازاڕەکانی جیهان بە ١.٦٢ دۆلارە واتە ١٧٧ ترلیۆن ١.٦٢ = ٢٨٦.٧٤٠.٠٠٠.٠٠٠.٠٠٠ دووسەد و هەشتاو شەش تریلیۆن دۆلار.

حکومەتی هەرێمی کوردستان، لە ساڵی ٢٠٠٦ بە دواوە لەگەڵ ٥٠ کۆمپانیای جیهانیی گرێبەستی ئیمزا کردووە بۆ دەرهێنانی نەوت و گاز و گواستنەوەیان بۆ بازاڕەکانی جیهان.

ئاماژەی بەوەشکردوە، بە گوێرەی ئەو داهاتانەی کەهەیە، حکومەتی هەرێمی کوردستان لە ١٠ دەوڵەمەنتریین وڵاتەکانی جیهان ئەژمارد دەکرێت، لەرووی ئاستی بەرهەمهێنانی نەوت و گاز؛ لە ئێستادا حکومەتی هەرێم بەگوێرەی راپۆرتی ساڵانەی کۆمپانیای سۆمۆ هەرێم رۆژانە بڕی یەک میلیۆن و ٦٠٠ هەزار بەرمیل نەوت دەردەهێنێت لە ساڵی ٢٠٢١ ئەو ڕێژەیە بەرز دەبێتەوە بۆ ٢ ملیۆن بەرمیل نەوت لە رۆژێکدا، کە دەکاتە یەک میلیارد و دووسەد میلیۆن دۆلار بۆ مانگێک و لە ساڵێکدا دەکاتە ١٤ میلیارد و چوار سەد میلیۆن دۆلار، ئەمە بێجگە لەوەی رۆژانە دوو سەد و ٥٠ هەزار بەرمیل نەوت کە رادەستی حکومەتی عێراقیی دەکات لەبەرامبەر بەشە بودجەی هەرێم کە لە موازەنەی ساڵی ٢٠١٩  بریتی بووە لە %١٣ واتە ١٣ میلیارد دۆلار.

ئەو نووسەرە، ئەوەش ئاشکرادەکات: جگە لە داهاتی ناوخۆ کە مەزەندە دەکرێت بە شەش میلیارد دۆلار لە ساڵێکدا، جگە لە ئیستسماراتی هەرێم لەدەرەوەی وڵات کە خاوەندارێتیی دەکرێت لەلایەن کۆمپانیاکانی قەیوان و زاگرۆس و نۆکان کە مەزەندە دەکرێت بە ١٦٠ میلیارد دۆلار. داهاتی فڕۆکەخانەکانی سلێمانی و هەولێر و خاڵە سنوریەکانی باشماخ و پەروێزخان و ئیبراهیم خلیل تەنها لە ساڵی ٢٠١٣ زیاتر بووە لە ٧ تیلیۆن دینار کە دەکاتە ٥ میلیارد دۆلار ئەم ڕێژەیە بە پێی ساڵەکان و زیادبوونی پێداویستی ئەم ڕێژەیە زیادی کردووە بۆ نۆ تریلیۆن دینار.

زانکۆ ناصر ئەحمەد، ئەوەشی بە ئازادیی کۆمەڵگە راگەیاند: جگەلەوەی پارەی بەرپرسەکانی هەرێمی کوردستان، لەلایەکی ترەوە، هەروەها دوو کۆمپانیای ئیماراتی کۆنتراکتێکی ٢٠ ساڵی لەگەڵ هەرێم ئیمزا کردووە، بەمەبەستی دەرهێنانی گازی سرووشتیی کە بڕەکەی ٢٥٠ میلیۆن مەتر سێجای ڕۆژانەیە کە داهاتی یەک مانگ بەگوێرەی پێوەری حراریی بریطانیی بۆ هەر یەک میلیۆن یەکەی حراریی کە دەکاتە ٢٤ مەتر سێجا گاز و ئەم رێژەیە بگۆڕینەوە بە دۆلار دەکاتە ٩٠٠ میلیۆن دۆلار واتە بۆ ساڵێک دەکاتە ١٠ میلیار و هەشت سەد ملیۆن دۆلار. کەواتە هەرێمی کوردستان هەژار نییە تا بچن خێر و خێراتی بۆ کۆ بکەنەوە بەڵکو لێیان بپرسن ئەو پارانە لە کوێن؟ لێیان بپرسن برتان بۆ کوێ؟ حکومەتی هەرێم ئەم پارانەی شاردوەتەوە و نایدات بە فەرمانبەران و کارمەندان کە کاریان بۆ دەکەن و مافی خۆیانە، حکومەتی هەرێم کارمەندان و پێشمەرگە وەزارەتە ئەمنیەکانی بەستۆتەوە بە بەشە بودجەی عێڕاق بەڵام لەو لاوە هەرێم خەریکی بازرگانیی نەوت و کۆکردنەوەی داهاتی ناخۆو دەرەوەیە و نایدات بە خەڵکەکەی.

تاگه‌كان

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: