گۆشه‌ی ئازاد

ئەوەی لەگەڵ کوردایەتییەکەی پارتییدا نەبێ، خائین و خۆفرۆشە!

له‌ كاتێكدا ١٦٠ وڵاتی جیهان، سزای له‌سێداره‌دانیان هه‌ڵگرتووه یان بۆ كاتێكی نادیار هه‌ڵیانپه‌ساردووه‌، به‌ڵام كۆماری ئیسلامیی ئێران تا ئێستاش، له‌ په‌یوه‌ند به‌ سزای له‌ سێداره‌دان و خنكاندن، به‌ یه‌كێك له‌ به‌ جه‌به‌روتتریین وڵاتانی جیهان دێته‌ ئه‌ژماردن.

موراد حەسەن
کامیار سابیر

 

 

له‌ كاتێكدا ١٦٠ وڵاتی جیهان، سزای له‌سێداره‌دانیان هه‌ڵگرتووه یان بۆ كاتێكی نادیار هه‌ڵیانپه‌ساردووه‌، به‌ڵام كۆماری ئیسلامیی ئێران تا ئێستاش، له‌ په‌یوه‌ند به‌ سزای له‌ سێداره‌دان و خنكاندن، به‌ یه‌كێك له‌ به‌ جه‌به‌روتتریین وڵاتانی جیهان دێته‌ ئه‌ژماردن. به‌ گوێره‌ی داتاكانی ڕێكخراوی لێبوردنیی نێوده‌وڵه‌تیی(Amnesty International)، رێژه‌ی له‌سێداره‌دان له‌ ئێراندا‌، به‌ دووه‌م وڵات له‌ جیهاندا له‌ دوای وڵاتی چین(صین) دێت، له‌ كاتێكدا، كۆی دانیشتووانی چین، ١٧ جار له‌ كۆی دانیشتوانی ئێران زیاتره‌.

كۆماری ئیسلامیی ئێران، مێژوویه‌كی چل ساڵه‌ی هه‌یه‌ له‌ زیندانییكردن و ئیعدامكردنی نه‌یاره‌ سیاسییه‌كانی، مێژوویه‌كی دێزی هه‌یه‌ له‌ پێشێلكاریی مافی مرۆڤ و ئازادییه‌كاندا، له‌گه‌ڵ سعودییه‌ و توركیادا، هه‌رسێكیان به‌شێكی گه‌وره‌ن له‌و نائارامییه‌ی ناوچه‌كه به‌ گشتیی و عێراق به‌ تایبه‌تیی، رووبه‌ڕووی بوه‌ته‌وه‌.جه‌لالییه‌كان و مه‌لاییه‌كان مێژوویه‌كی دوور و درێژیان هه‌یه‌ له‌ شه‌سته‌كانی سه‌ده‌ی ڕابردووه‌وه‌ تا به‌ كۆماری ئیسلامیی و ئەم کاتە ده‌گات (وه‌كو یه‌كێتیی و پارتیی) لە شکاندن و شەڕەجوێن و ئەکتی موخابەراتیی. وێڕای ئه‌وه‌ی باوه‌ڕمان وایه‌ هه‌ر له‌ ئه‌ساسه‌وه‌، ده‌ستدانه‌ چه‌ك و پێشمه‌رگایه‌تیی له‌ شه‌سته‌كانه‌وه‌ بۆ ئاشبه‌تاڵ و دواتریش شۆڕشی گوڵان و شۆڕشی نوێ، بناغه‌ی هه‌مویان به‌ عه‌ماله‌تی ئیقلیمیی ده‌ستی پێكردووه‌ و تا ئێستاش به‌ میكانیزمی جۆراوجۆر، بۆ ئیطلاعاتی ئێرانیی و میتی توركیی، بۆ لۆبیی خه‌لیجیی و لۆبیی یه‌هودیی، درێژه‌ی هه‌یه‌.

ئه‌وه‌ی ئێمه‌ ده‌مانه‌وێ جه‌ختی لێ بكه‌ینه‌وه‌، كاریگه‌ریی ئه‌م چه‌كه‌ نه‌ژادیی و طائیفییه‌یه‌ (كوردی سوننه‌ به‌رامبه‌ر شیعه‌ی ئێرانی) كه‌ چۆن تاجیره‌كانی كوردایه‌تیی، مامه‌ڵه‌ی سیاسیی و ئابووریی، پێوه‌ ده‌كه‌ن؟ گه‌وره‌تریین گرفتی تاڵه‌بانیی و جه‌لالیزم، تا به‌ كوڕ و برازاكانی ده‌گات، ئه‌وه‌یه‌ له‌ مێثۆد و له‌ مانیفێستدا، جیاوازییان له‌سه‌ر نه‌هجی فاشیل و ساقیطی كوردایه‌تیی نه ‌بووه‌ و نه‌ هه‌یه‌، به‌ڵكو شه‌ڕه‌كه‌یان له‌سه‌ر ئه‌وه‌یه‌ كه‌ پارتیی، كوردایه‌تییه‌كه‌ی ساخته‌یه‌ و ئه‌وه‌ی خۆیان ئۆریجیناڵ و ئه‌صیڵه‌. له‌ واقیعیشدا شه‌له‌گه‌ی هه‌موو جۆگه‌ گه‌وره‌ و بچوكه‌كانی كوردایه‌تیی، لای پارتییه‌وه‌ ده‌كرێنه‌وه‌ و كوردایه‌تیی و بنه‌ماڵه‌ی بارزانیی، دووانه‌یه‌كن، هه‌ركه‌س پێیوابێت لێكیان جودا بكاته‌وه‌، له‌ وه‌همێكی نه‌ته‌وه‌یی و خورافاتێكی نه‌ژادیی غەڵیظدا ده‌ژیه‌ت و هه‌موو جۆره‌كانی كوردایه‌تیی، به‌ ئه‌فه‌ندییه‌كه‌ی تاڵه‌بانیی و به‌ ناسیۆنالیزمه‌ مه‌ده‌نییه‌كه‌ی ئیبراهیم ئه‌حمه‌د و ناسیۆنالیزمه‌ نیشتمانییه‌كه‌ی نه‌وشیروان موصطه‌فاشه‌وه‌، هه‌مویان، به‌رده‌وام له‌ خزمه‌تی چه‌ته‌گه‌رییه‌ پیاوكوژییه‌كه‌ی كوردایه‌تییه‌ رەسەنەکەدا بوون كه‌ لای كه‌م ٧٥ ساڵه،‌ له‌ ده‌ست بارزانیی باوك و كوڕ و كوڕه‌زاكانیدایه‌.

ئه‌وه‌ی گرنگه‌، لایه‌نه‌ سیاسیی و فیكرییه‌كه‌ی ئه‌م ئیعدامكردنه‌ی موصطه‌فا سه‌لیمییه‌. وێڕای ئه‌وه‌ی دژی ئیعدام و سیاسه‌ته‌ سه‌ركوتكاره‌كانی كۆماری ئیسلامیی ئێرانین، وێڕای ئه‌وه‌ی كه‌سی سیاسیی ده‌بێ رێز له‌ ئیراده‌ی بگییرێ و ده‌ست به‌ ڕوویه‌وه‌ نه‌نرێ كه‌ داوای په‌ناگه‌یه‌ك ده‌كات، ئه‌مه‌ به‌ده‌ر له‌وه‌ی راست بێت یه‌كێتیی نیشتمانیی ته‌سلیمی كردبێته‌وه‌ یان له‌ دیوی ئێران گییرابێته‌وه‌! ئێستا پارتیی له‌ رێگه‌ی كوردایه‌تیی و ته‌خویینه‌كانیه‌وه‌، هه‌موو یه‌كێتیی له‌ كون، ناوه‌. روونكردنه‌وه‌کەی ئاساییشی پێنجوێن، گاوانێك كه‌ ساڵی دووجار ئاوه‌دانیی ببینێت، وردتر و عه‌قڵانییتر، تەنانەت موخابەراتییانەتر، ده‌ینووسێت. یه‌كێتیی، له‌ دۆخێكدایه‌ كه‌ هه‌رگیز ناتوانێ به‌هه‌مان چه‌كی پارتیی، واته‌ به‌ كوردایه‌تیی، داكۆكیی له‌ خۆی بكات. هه‌ر ئه‌مه‌شه‌، وایكردووه‌ كه‌ یه‌كێتیی له‌ ڕوئییه‌ی سیاسیی و فیكری سیاسییدا، به‌ موو، له‌ پارتیی جیاواز نه‌بێت. به‌ پێچه‌وانه‌وه‌، كادیره‌كانی یه‌كێتیی به‌ جدیی كوردایه‌تیی ده‌كه‌ن، به‌ڵام ئه‌وانه‌ی پارتیی، باش تێگه‌یشتوونه‌ كه‌ باشتریین بیزنسه‌ و كێ ئازایه‌، به‌شی خۆی ببات.

پارتیی، بۆچی قوفڵی له‌ ده‌می زۆریینه‌ داوه‌؟

فێڵه‌كه‌، لێره‌وه‌ ده‌ست پێده‌كات كه‌ به‌ تێرمی فیكریی پێیده‌گوترێ “ناسیونالیزمی نه‌ژادیی” كه‌ كوێرایی چاوی زۆربه‌ی هه‌ره‌ زۆری نه‌ته‌وه‌ییه‌كان، نه‌ژادییه‌كان، ئیسلامییه‌كان، شیوعییه‌كان، كۆمیۆنیسته‌كان، كۆمه‌ڵه‌كان، دێموكراته‌كانی داهێناوه‌ و ته‌نانه‌ت هه‌ندێ لایه‌نگرانی عه‌وامی په‌كه‌كه‌شی گرتۆته‌وه. هاوكات، رییزێكی به‌ریینیش له‌و نوخبه‌ موهه‌ڕیجه‌ نه‌ته‌وه‌ییه‌ی گرتووەته‌وه‌ كه‌ خۆیان به‌ سه‌ربه‌خۆ و بێلایه‌ن ده‌زانن، بە تایبەتیی مێدیای ئەهلیی! لە سلێمانیی، به‌ڵام فاشیزمی نه‌ژادیی، كه‌ڕ و كوێری كردوون. ئه‌گه‌ر كاره‌كته‌ری سیناریۆكه‌”سه‌لیمیی” كورد نەژاد، نه‌بووایه‌، جه‌هانبه‌خشێكی فارس بووایه‌ یان عه‌لیی ئه‌كبه‌رێكی ئاذه‌ریی بووایه‌، یاخود محه‌مه‌د ئه‌سه‌دییه‌كی عه‌ره‌بی ئه‌حواز یان به‌لوجێك بووایه‌، مێش میوانی ئەم هەموو کوردە نەتەوەییە، نه‌بوو. كه‌واته‌ ئه‌و هه‌موو داد و فیغان و خۆڕنیینه‌وه‌ نه‌ته‌وه‌یی و نه‌ژادییه‌، پێوەندیی بە ئازادییخوازییەوە نییە، بەڵکو له‌وێوه‌ سه‌رچاوه‌ ده‌گرێ كه‌ ئه‌مانه‌ به‌ فاشیزمی نه‌ژادیی، لە مرۆڤبوون خراون و له‌ پرۆسێسێكی ئیستیحماریی طولانییدا (به‌ قه‌ولی ئێرانییه‌كان)، بەهۆی رەیعەوە بێت یان ئیستیحماری نەژادییەوە، وەکو رۆبۆتیان لێ هاتووە و بەکار دەهێنرێن.

موصطه‌فا سه‌لیمیی كێیه‌؟

به‌ رای عه‌لیی جه‌وانمه‌ردیی (ئەم پیاوە موخابەراتییە رەیعخۆرە، مرۆڤ شەرم لە خۆی دەکات بیخاتە جوملەوە)، سه‌لیمیی زیندانییەكی سیاسیی كورده‌ و له‌سه‌ر بییروڕاكانی و نزییكایه‌تیی له‌ یه‌كێك له‌ هێزه‌ ئۆپۆزیسیۆنه‌كانی كوردستانی ئێران، ١٧ ساڵه‌ زیندانیی كراوه. ئه‌مه‌ له‌كاتێكدایه‌، هه‌ر دوای هه‌واڵی ده‌ستگییركردنی سه‌لیمیی، له‌ لایه‌ن هه‌ندێك له‌ هاوڕێیان و ناسیاوانی ئه‌و قوربانییەوە، سه‌لیمیی وه‌ك ئه‌ندامی باندێكی دزیی، ڕاووڕووت و پیاوكوژیی، ناسێنرا. له‌وه‌ش زیاتر، هیچ یه‌كێك له‌ حیزبه‌كانی كوردستانی ئێران، به‌ هه‌ردوو دیموكرات و كۆمه‌ڵەکانە‌وه‌ تا ده‌گاته‌ پژاك، خاوه‌ندارییەتی خۆیان بۆ سه‌لیمیی، تا ئێستاش ده‌ر‌نه‌بڕیوه‌. ئه‌م دوو جۆره‌ له‌ تێڕوانیین‌ و هه‌ڵسه‌نگاندنانه‌ی بۆ سه‌لیمیی ده‌كرێت، گومان لەسەر کەیسەکە زیاتر دروست دەکات و بە تەواویی کراوەتە کەیسێکی موخابەراتیی کە چەند دەسگایەکی موخابەراتیی، بەوردیی و بە بەرنامە، کاریان لەسەر کردووە.

سه‌ره‌ڕای زانیینی سروشتی دانیشتووانی سه‌ر سنوری هه‌رێم له‌گه‌ڵ حكومه‌تی ئێران و رادده‌ی میواندۆستیی و كو‌لتووری پاراستنی لێقه‌وماوان له‌ لایه‌ن گوندنشیینانی ئه‌و ده‌ڤه‌ره‌وه‌، هه‌ڵكه‌وته‌ی جیۆگرافیی ئه‌و سنووره‌ و دابه‌شبونی هێزه‌كانی ئێران و پ.ك.ك و یه‌كێتیی له‌و ناوچه‌یه‌، ئێمه‌ ناچینه‌ ناو قه‌ضاوه‌تی ئه‌وه‌ی كه‌ ئاخۆ سه‌لیمیی به‌ ده‌ستی ئه‌نقه‌ست و به‌ مه‌به‌ست ته‌سلیمی ئێران، یان سنوورداش كراوه‌ته‌وه‌ وه‌ یاخود له‌ دیوی ئێران ده‌ستگیركراوه‌ته‌وه‌. ئه‌مانە کەیسی موخابەراتیین ‌ و به‌ تێپه‌ڕبوونی كات ئه‌م راستییانه‌، بەر رووناکیی دەکەون، بەڵام بێدەنگیی یەکێتیی، بۆ خۆی گومانەکان لەسەر خۆی زیاد دەکات.

ئه‌م هه‌ڵڵایه‌، له‌م كاته‌دا بۆچی؟

روونه،‌ باشتریین كه‌ره‌سته‌ و ئامراز بۆ ته‌رویج و بره‌ودان به‌ كوردایه‌تیی، ته‌خویینكردنی لایه‌نی به‌رامبه‌ر بووه‌ و پارتیی هەمیشە کەسی پێ وەطەنیی نەبووە و هەرکەسیش لەگەڵ کوردایەتییە تیجاڕییەکەی ئەودا نەیاتەوە، ئەوە خائین و خۆفرۆشە. ره‌گ و ڕیشه‌ی ئه‌م ته‌خویینكردنه‌، لای كه‌م له‌ كوردستانی عێراقدا، ده‌گه‌ڕێته‌وه‌ بۆ ده‌یه‌كانی په‌نجاكان و شه‌سته‌كانی چەرخی رابردوو. لایه‌نه‌كانی كوردایه‌تیی، بۆ خۆ ره‌سه‌نكردن و پیرۆزكردن، ‌به‌ ته‌خویینكردنی به‌رامبه‌ره‌كەیان، هه‌وڵی باڵانسكردنه‌وه‌ی خیانه‌ته‌كانی خۆیان داوه‌. بۆ ئه‌مه‌ش ده‌سگای راگه‌یاندنی گه‌وره‌ و كۆمه‌ڵێک ئه‌سپی ته‌ڕ‌واده‌یان، به‌ پاره‌ و سامانی گشتیی خه‌ڵكی كوردستانی عێراق، سپۆنسه‌ر كردووه‌. هه‌ندێك له‌و ئه‌سپانه،‌ بە تایبەتیی هەندێ لە کوردەکانی ئێران، راسته‌وخۆ و به‌ پاره‌یه‌كی زۆر و زه‌وه‌ند سپۆنسه‌ركراون، هه‌ندێكیشیان، به‌ هۆی ختوكه‌ی ده‌ماری نه‌ژادیی، ئیثنیكیی و مه‌ذهه‌بییه‌وه‌ ده‌كه‌ونه‌ ناو زێرابی ناسیونالیزم و هه‌ندێ جاریش، خۆبه‌خۆ و بێ ئه‌وه‌ی به‌ خۆیان بزانن، ده‌بنه‌ وته‌بێژی ئه‌ندازیارانی خوطه‌ جه‌هه‌ننه‌مییه‌ موخابه‌راتییه‌ ئیقلیمییه‌كان.

دەقیق، له‌و رۆژه‌ی كه‌ دایكێكی كوردستانی توركیا، ته‌رمی رۆله‌كه‌ی به‌ له‌توپه‌تكراویی، له‌ لایه‌ن ده‌سه‌ڵاتی فاشیزمی ئه‌ردۆغانییەوە، له‌ رێگه‌ی خزمه‌تگوزاریی پۆسته‌وه،‌ بۆ دێته‌وه‌، عه‌لیی جه‌وانمه‌ردیی ختوكه‌ی ده‌ماری نه‌ژادیی قه‌وم و قیله‌ی كوردایه‌تیی، نوخبه‌ی چالاكووانی سیاسیی و مه‌ده‌نیی هێڕ، هه‌ڵسوڕاوانی هێزه‌كانی ئۆپۆزسیۆن (به‌ كۆن و تازه‌وه‌)، تاكی ساویلكه‌ و نه‌خوێنده‌وار، كۆمه‌ڵێك شه‌هاده‌داری بێسه‌واد و نوخبه‌یه‌كیش له‌ خه‌ڵكی عه‌وامی سه‌ر به‌ پ.ك.ك، ده‌دات و كاره‌ساتی له‌توپه‌تكردنی رۆڵه‌یه‌كی كوردستانی تورکیا به‌ ده‌ستی فاشیزمی توركیی كه‌ له‌ مێژووی نوێی مرۆڤایه‌تییدا ده‌گمه‌نه‌، به‌ رووداوه‌كه‌ی سه‌لیمیی، له‌بییر كۆمه‌ڵانی خه‌ڵك ده‌باته‌وه‌ و په‌رده‌پۆشی ده‌كات. وێڕای ئەوەی مانگانە صەدان میلیۆن دۆلار لە مووچەی خەڵک دەدزن و خەڵکیان بە برسییەتیی و هەژاریی، بەهۆی کۆرۆناوە، کەرەنتینە کردووە، هەمووی دەکەوێتە ژێر لێفەکەی کەیسی سەلیمییەوە کە بۆ خۆی قوربانییە.

كێلێكی تر كه‌ جه‌وانمه‌ردیی، بە دەستوری پاراستنی پارتیی، به‌ هه‌مان به‌ردی رووداوه‌كه‌ی سه‌لیمیی، شكاندی، هه‌وڵی باڵانسكردنه‌وه‌ی خیانه‌تی كوشتن و ته‌سلیمكردنه‌وه‌ی سلێمانی موعینییه‌ كه‌ له‌ كۆتایی شه‌سته‌كاندا، بە دەستوری‌ بارزانیی باوک و کوڕەکانی ده‌كوژرێت و ته‌سلیمی رژێمی ئه‌وكاتی ئێران، ده‌كرێته‌وه‌. جه‌وانمه‌ردیی و ئه‌وانه‌ی سپۆنسه‌رییان كردووه‌، زۆر وه‌ستایانه‌ هه‌مان وته‌كانی شه‌هید موعینیی كه‌ له‌ دواساته‌كانی ده‌ستگیركردنیدا كردویه‌تی (خۆتان لێره‌ بمكوژن به‌ڵام ته‌سلیمی ئێرانم مه‌كه‌نه‌وه‌) به‌ خه‌تێكی جوان و رازاوه‌، له‌سه‌ر وێنه‌كانی سه‌لیمییان نووسیی و له‌و ره‌شه‌جۆشییەی سه‌ر سۆشیال میدیای كوردیی، بە ئایکۆنیان کرد. به‌ دڵنیاییه‌وه‌ هه‌ڵبه‌ستنی هه‌مان رسته‌ی شه‌هید موعینیی و دانانی له‌سه‌ر زاری سه‌لیمیی، وه‌هه‌روه‌ها خاڵی سنووریی ته‌سلیمكردنه‌وه‌ی هه‌ردووكیان كه‌ پێنجوێنه‌، به‌ رێكه‌وت و بێ به‌رنامه‌ی داڕێژراو، نه‌بووه‌! ئەوە لە کاتێکدایە، بارزانیی، لە شەستەکاندا ویستوویەتی موعینیی بە زیندوویی تەسلیمی ساواکی ئێران بکاتەوە، بەڵام ئێرانییەکان پێیان باش بووە بە کوژراویی بدرێتەوە، بۆ ئەوەی شاهێدمانی قاتلبوونەکەیش بە شۆڕشگێڕەکانی کوردایەتیی، بسپێرێت.

هەر دوای چه‌ند سه‌عاتێك له‌ بڵاوبونه‌وه‌ی هه‌واڵی له‌ سێداره‌دانی سه‌لیمیی، ورده‌ ورده‌ ده‌ركه‌وتنی هه‌ندێ سه‌ره‌داو، به‌تایبه‌ت له‌ په‌یوه‌ندیی به‌ ناسیاسییبوونی سه‌لیمیی و پێشیینه‌ی كاری مافیایی ئه‌و، كۆمه‌ڵێك له‌ نوخبه‌ی رۆژنامه‌نووس و چالاكوانی مه‌ده‌نیی هه‌ڵخه‌ڵه‌تێنراو، پۆست و ڕه‌شه‌جۆشه‌كانی ناو سۆشیال میدیایان كشانده‌وه‌ و هه‌ندێكیان داوای لێبوردنیشییان كرد. ده‌ستی چه‌وری خۆیان، به ‌سه‌ری چه‌ند رێكخراوێكی مه‌ده‌نیی كوردستانی ئێران سڕیی، بێئاگا له‌وه‌ی ئه‌و ڕێكخراوانه‌ش له‌ لایه‌ن لایه‌نێكی بزوتنه‌وه‌ی كوردایه‌تیی (پارتیی دیموكراتیی كوردستان)، بۆ پۆڵیشكردنی خوطه‌ موخابه‌راتییه‌كانی خۆی، سه‌پۆرت و سپۆنسه‌ر كراون. ئه‌مه‌ رێك وه‌ك ئه‌وه‌‌ وایه‌، كاتێك موراد حه‌سه‌ن له‌ شاری سیدنی ئوسترالیا، چاوپێكه‌وتنێك له‌گه‌ڵ ئیسماعیل بێشكچیی ئه‌نجام ده‌دات، لێی ده‌پرسێت: ئاخۆ ئێوه‌ بۆ كاره‌كانتان، بۆ لۆبییكردن بۆ ده‌وڵه‌تیی كوردیی و گه‌ڕانتان به‌ وڵاتاندا، له‌ كوێ پاره‌ ده‌هێنن؟ بێشكچیی، له‌ وه‌ڵامدا ده‌ڵێت: ڕێكخراوی خێرخوازیی بارزانیی، سه‌پۆرتمان ده‌كات!

لە کۆتاییدا، وێڕای کارەساتی دەسگا ئەمنیی و موخابەراتییەکانی پاراستن و زانیاریی، بەڵام پارتیی ئەمجارەش، رێک وەکو سەردەمی ریفراندۆمەکە، سەلماندییەوە بەهۆی پارەیەکی خەیاڵیی لە دزیینی سامانی نیشتمانیی، بەهۆی مێدیا زەبەلاحەکەیەوە و بەهۆی سیستەماتیکبوونی کوردایەتییەکەیەوە، هەمووانی لە کون نایەوە و لەسەروو هەمووشیانەوە، یەكێتییەکی صەد و بیست و ئەوەندە ئەندامی سەرکردایەتیی، وەکو داوڵ بۆ مەرەزە خۆماڵییەکەی تیجاڕەتی کوردایەتییە تاڵانیی و چەتەگەرییەکەی خۆی، لە خاچی تەخویینی کوردایەتیی، داوە. یەکێتیی لە دۆخێکی ئەوەندە خراپدایە کە نە دەوێرێ رەتی بکاتەوە کە سەلیمیی تەسلیم نەکردووەتەوە، نە دەشتوانێ داکۆکیی لە خۆی بکات. هۆکارە سیاسیی و فیکرییەکەی ئەمە، بە پلەی یەکەم بۆ ئەوە دەگەڕێتەوە، تەخویینەکانی مێدیای پارتیی و لایڤی ئەندامێکی پاراستنی کوردایەتیی، لە تەواوی ستراکتۆرە حیزبیی و سیاسیی و فیکرییەکەی( کە نییەتی) یەکێتیی، بەهێزتر و کاریگەرترە.

تاگه‌كان

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: