ڕاپۆرت

“لاوازیی که‌سایه‌تیی سیاسیی پاڵنه‌ربووه‌ بۆ به‌رهه‌م هێنانی خیانه‌تی سیاسیی”

ئا: ئازادیی كۆمه‌ڵگه‌

لێکۆڵه‌ران و توێژه‌رانی سیاسیی رایده‌گه‌یه‌نن: خیانەت چەمکێکە دەکرێت به‌ هەموو کاروکردەیەک بوترێت، ئەگەر بچێتە خزمەت جێگیرکردن و هێشتنەوەیی داگیرکاریی و دەوڵەتی نەتەوەیی و مەزهەبیی کارەساتهێن! خیانه‌ت له‌ نێو بزوتنه‌وه‌ی رازگارییخوازیی گه‌لی کورددا پێوه‌ندیی به‌ لاوازیی که‌سایه‌تیی کورده‌وه‌ هه‌یه‌، پێوه‌ندیی به‌سه‌رکرده‌ سیاسییه‌کانی کورده‌وه‌ هه‌یه‌ که‌ بۆ به‌رژه‌وه‌ندیی ماددیی و حیزیی مه‌بادیئو پرانسییپه‌کانی خۆیان فرۆشتووه‌!

جه‌ختیشده‌که‌نه‌وه‌:" پارتیی و یەکێتیی زەمینەی خیانەتکردنیان زۆر خۆش و ئاسان کردووە، پارتیی و بنه‌ماڵه‌ی بارزانیی هه‌موو رێگایه‌کی ناشه‌رعیی ده‌گرنه‌به‌ر بۆ مانه‌وه‌، بۆنموونه‌ گاڵتەجاڕیی ریفراندۆم کە پارتیی بە فەرمانی ئەردۆگان ئەنجامیدا، گەورەترین خیانەت بوو بەرامبەر چەمکی ئازادیی و ژیانی پڕ لە کەرامەت!

ئاماژه‌ بۆ ئه‌وه‌ده‌که‌ن:"ئه‌گه‌ر به‌دیاریکراویش بڵێین له‌ نێو ئه‌و سه‌رکرده‌ سیاسییانه‌ی کورددا که‌ ئێستا له‌ ژیانداماون، هیچ که‌سێک هێنده‌ی مه‌سعود بارزانیی خیانه‌تی نه‌کردوه‌ و به‌شداریی نه‌کردووه‌ له‌ خیانه‌تی نیشتیمانیی-دا!"

niaz hamid....

نیاز حامید ئیبراهیم، چاودێر و لێكۆڵەری سیاسیی، به‌ ئازادیی کۆمه‌ڵگه‌ی راگه‌یاند: خیانەت هەر خیانەتە ئەگەر ٢٠٠ ساڵ پێش ئێستا کرا بێت، لێ پێویستیی زیاتر بەپێناسەی هەلومەرجی تازەیه‌ بۆ رێگا خۆشکردن بۆ ئه‌وه‌ی خیانەت بکرێت. بۆ ئێمەی کورد خیانەت لە پرینسیپەکانی جیاوازە لەگەڵ چەمکی خیانەت بۆ گەلانی دیکە و جڤاکێکی دیکە. هەلومەرجی تازە بۆ زەمینەسازیی خیانەتکردن، شێواز و رێبازیی دیکەی بەخۆیەوە دیووە. خیانەتکاران ئیبداع دەکەن لە ئەنجامدانی خیانەت بۆ بەرژەوەندیی تەنگی کەسی و بنەماڵەیی و خێڵەکیی.

وتیشی: دەکرێت ئێمە فۆکەس بخەینە سەر باشووری کوردستان، بەڵی دەتوانیین بڵێین خیانەت بەشێکە لە مێژووی تەواوی بزافی چەکداریی، بەناوی کوردایەتیی و نیشتمانپەروەریی و دەیان خیانەتی مەزن لە جڤاکی کوردان لە باشوور کراوە. بە مانایەکی دیکە شەڕی تایبەتی داگیرکەرانی کوردستان، ئەرکێکی هەرە لە پێشی، پێشخستنی چەمکی خیانەتە کە سەرباری نوخبەی دەسەڵاتداریی ناو حیزبەکان ویستویانە شۆڕبێتەوە ناو کۆمەڵگه‌یش، هه‌تا وای لێهاتووە خیانەت چەمکێک نییە شەرمهێنێت بۆ خیانەتکار. هەر بۆ نموونە ٣١ی ئاب گەورەترین خیانەت بوو کە پارتیی پێی هەڵسا! لێ سەرکردایەتییەکەی بە ئاسایی تێوریی بۆ دەکات و تەنانەت کادیرەکانی خوارەوەی ئەم حزبە، جورئەت دەکەن کە بڵێن شانازیی بە خیانەتێکی ئاوا دەکەین. بۆیە بە دیدی من خیانەت بە بەرنامە پیلانی رەوایەتی بۆ دەکێشرێت تا خیانەت وەک کردەیەکی قێزەوەن سەیر نەکرێت، لای ئاسایی بێت، ئەگەر رۆژانە دووبارەی بکاتەوە. بە مانایەکی دیکە هەوڵی جددیی هەیە ببێ بە کولتوورێک لە ناو جڤاک و بە ئاسانی جێگەی ببێتەوە.

ئه‌وه‌شده‌خاته‌ڕوو، خیانەت رەخساندنی زەمینەیە بۆ ئاسان ئەنجامدانی و لە باشوور پارتیی و یەکێتیی زەمینەی خیانەتکردنیان زۆر خۆش و ئاسان کردووە، ئەویش بە چەند تەکتیکێك: ١- بە هەژارکردنی خەڵک، کاتێ لایەنی ئابووریی تاکو خێزان و جڤاک لاواز دەکرێت، بە هاسانی ئەو تاکە و جڤاکە رام دەکرێت بۆ خیانەتکردن. ٢- بەستانەوە و گرێدانی ژیاری تاک و جڤاک بە خۆیانەوە، هەر کاتێک خیانەتێکیان کرد، ئەو تاکو جڤاکە چەپڵەی بۆ لێبدات، ئەگەرنا نانبڕاوی دەکات. ٣-تیرۆر و تۆقاندن وەک ئامرازێک بۆ بێئیرادەکردنی تاک و جڤاک، بۆ تەسلیمبوون بە خیانەت. ٤- میدیای چەواشەکار، ئەو میدیایەی کە لە دەزگای شەڕی تایبەت تەعلیمات وەردەگرێت و کردەی خیانەت لای تاک و جڤاک ئاسایی نیشان دەدات، لە بەرمبەریشدا بەرخۆدان و بەرگریی وەک کابوسێک نیشان دەدات و لە بەرچاوان رەشی دەکات ٥- پرۆگرامی خوێندن و پەروەردە کە ئەمەیش کاریگەریی نەرێنی دورست دەکات بۆ پێناسەی خیانەت، چۆن؟ کاتێ بزاڤی چەکداریی لە باشوور بە شۆڕش و بەرگریی و بەرخۆدان هەژمار دەکریت و ئەو هەڵسوڕاوانەی ئەم بەناو بزافە چەکدارییە خیانەت دەکەن، کەواتە بێ ئەوەی هەست بکرێت لە دەوری خیانەتکاران پارێزبەندییەک دورستکرا، بەمانایەکی دیکە رەوایەتی دان بە خیانەت و خیانەتکاران، بە پاساوی ئەوەی ئەوان پێشتر بزاڤێکی چەکدارییان بەڕێوە بردووە، بۆیە پارێزراون و خیانەت ناکەن!.ئەم شێوازە لە پەروەردە و فێرکردنە کارەسات دەخوڵقێنێت لەبەرامبەر پێناسەی خیانەت و تەڤلی هەڤیەک لە هزری مرۆڤەکان دورست دەکات.

ئه‌و، راشیده‌گه‌یه‌نێت: ئەوەی پاساو بۆ خیانەت دەهێننەوە بەوەی "بۆچوونی جیاوازە" مەترسیدارە، تۆ سەیر بکە لە ئۆپەراسیۆنی سەندویچ کە تورکان لە ساڵی ١٩٩٢ ناویان لێ نابوو بۆ سەر گەریلا، پارتیی و یەکێتیی وەک دوو لایەنی مورتزەقە بەشدارییان تێداکرد و پاساوێکیان بەکار دەهێنا، ئێستایش بەکاری دەهێنن. کوردستانی ئێمە و کوردستانی ئەوان، ئەم جیاکارییە و خۆنەدۆزینەوە لەوەی پرسی گەلی کورد یەکە یا جیۆگرافیاکەی یەکە و پارجە پارچە کراوە، پاساوێکی هێجگار قێزەوەنە بۆ رەوایەتیدان بە خیانەت. خیانەت هیچ پێوەندیی بە رای جیاوازەوە نییە، رای بە تەکتیک و ستراتیژیی جیاوازەوەش نییە، خیانەت چەمکێکە دەکرێت بۆ هەموو کاروکردەیەکی بوترێت ئەگەر بچێتە خزمەت جێگیرکردنی و هێشتنەوەیی داگیرکاریی و دەوڵەتی نەتەوەیی و مەزهەبی کارەساتهێن. هەر بۆ نمونە گاڵتەجاڕیی ریفراندۆم کە پارتی بە فەرمانی ئەردۆگان ئەنجامیدا، گەورەترین خیانەت بوو بەرامبەر چەمکی ئازادیی و ژیانی پڕ لە کەرامەت؛ پارتی بە پراکتیک شانۆگەرییەکی نمایش کرد کە لە کۆتاییدا چەمکی ئازادیی سەربڕدرا. کێ هەیە ئێستا  جگە لە بەرخۆدەرانی تەڤگەری ئازادیی،بوێرێت باسی ئازادیی بکات؟!

ئه‌و لێکۆڵه‌ره‌ سیاسییه‌ ئاماژه‌ی به‌وه‌شکرد، "بۆ رووبەڕووبونەوەی چەمکی خیانەت، پێویستمان بە هۆشیاریی گەلە، ئەمەیش بە میدیایەکی بە هێز و هێزێکی بەرخۆدەر هەیە بۆ پاسکردنی جڤاک لە خیانەت، من ئەوەم تەنها بۆ رۆژهەڵات و باشوورە، رەنگە هەردوو جڤاکی باکور و رۆژئاڤا چەند هەنگاوێکی کەم لە پێش بن، لێ پێویستییەکە بۆ بەرەنگار بوونەوەی."

salar basire

سالار باسيره‌، توێژه‌ری سیاسیی،  ئاماژه‌ به‌وه‌ده‌کات: خیانەت دیاردەیەكی نوێ نییە. لە مێژووی گەلی كوردیشدا خیانەت وشەیەكی قورسە! لە ژیانی تاك و كۆمەڵگه‌ و سیستمەكاندا، بەڵام پێناسەمان بۆ خیانەت چییە و كێ خائینە و خیانەت چییە؟ لە سەردەمی نازییەكانی ئەڵمانیا لە دیدی نازییەكانەوە هەموو ئەوانە بە خائینی گەل دادەنران كە دژ بە دەوڵەت و گەلی ئەڵمان بونایه‌. هەروەها بە پێچەوانەیشەوە نازییەكان لە دیدی ئۆپۆزیسیۆنەكانەوە بە خائین ناو دەبران، چونكە دژ بە ئازادیی و دێمۆكراسییەت و ئایین و فیكر و بییروباوەڕە سیاسییەكانی تر بوون.

باسیره‌، بۆ ئازادیی کۆمه‌ڵگه‌ جه‌ختی کرده‌وه‌: ئەگەر لایەنێكی سیاسیی لە باشووری كوردستان، پشتگیریی رژێمێكی ستەمكاریی ئەردۆغان بكات دژ بە باكورو رۆژاڤاش بۆ بەرژەوەندییەكی تاك یان خێزان و خێڵێكی سیاسیی، ئه‌وا بۆ من خائینە! چونكە خیانەت بەرامبەر گەلەكەی خۆی دەكات. دەسەڵاتێك ستەم بەرامبەر بە گەلەكەی بكات و بێ بەشی بكات لە مافەكانی ژیان، ئەوا وەك خائینێكی میللیی و دژ بە گەل نێو دەبرێت. 

ئه‌و توێژه‌ر سیاسییه‌، وتیشی: خیانەت و جاشایەتیی و خۆفرۆشیی دیاردەیەكە كە لەناو كوردیشدا بەربڵاوە، هۆكارەكەشی دەگەڕێتەوەە بۆ ئەوەی دەوڵەتە دوژمنەكان توانیویانە بە ئاسانیی دەستییان پێی بگات، جا بە رێگای پارەوە بوبێت یان دوژمنایەتیی نێوان بنەماڵە و عەشیرەتەكانی دژ بە یەكتر، بۆ ونمونە ئەو دوژمنایەتییەی نێوان بارزانییەكان و هەركیی و سورچییەكان لە باشوور و ئەوەی دوایی بۆ چونە باوەشی رژێمی صدام حسێن. ده‌سه‌ڵاتدارانی تورك و ئێرانیی و عەرەب، كاری زۆریان لەسەر ئەم دیاردە قێزەونە كردوە بۆ بەكارهێنانیان نەك هەر بۆ شەڕی دژەكانیان، بەڵكو بۆ بووه‌تە كولتوورێكیش لەناو كورددا و فاكتەرێكی سایكۆلۆجیش بووە بۆ روخانی مەعنەویاتی كورد خۆی.

ئه‌و شیکاری ئه‌وه‌یش ده‌کات و لاویوایه‌"هەژاریی و خراپی باری ئابووریی فاكتەرێكە بۆ كڕینی خەڵكیی و كردنیان به‌ بەكرێگیراو، لێرەدا فاكتەری سیاسییش هەیە، ئەگەر نموونەی ئەنەكەسە بخەینە بەرچاو كە لەلایەن پارتیی و توركیاوە بەناوی حیزبێكی سیاسییەوە پشتگیریی دەكرێت، دژ بە شۆڕشی رۆژاڤای كوردستان. هەروەها كزیی هۆشیاریی سیاسیی و كۆمەڵایەتییشمان هەیە وەك هۆكار بۆ دروستبوونی دیاردەی خیانەت. پێچەوانەكەی ئاڕاستەیەكی تەندروست دەبێت بۆ سیاسەت و کۆمه‌ڵگه‌یەكی تەندروست.

ئاماژه‌ی به‌وه‌شکرد، هەر رەفتارێك ببێتە هۆی دژایەتی كردن بەرامبەر بە گەل و نیشتیمان، بەرامبەر بە ئازادیی تاك و كۆمەڵگە و دادپەروەریی ناوی دەنێم خیانەتی مەزن! هیچ پەیوەندیەكی تێدا نابینم ناوی بنرێت بۆچوونی جیاواز و یەكسان نییە. بە ئۆپۆزیسیۆنێكی سیاسیی ناو دەوڵەت كە كار بۆ گەیشتن بە دەسەڵاتی سیاسیی دەكات و خاوەن بۆچوون و بەرنامەی جیاواز بێت وەك لەوەی ده‌سه‌ڵات.

Ehmed mire

ئه‌حمه‌د میره‌، رۆژنامه‌نووس و مامۆستای زانکۆ، هێما بۆ مێژووی بزووتنه‌وه‌ی رزگاریی خوازیی گه‌لی کورد ده‌کات که‌ خاڵیی نه‌بووه‌ له‌ خیانه‌ت، به‌ڵکو زۆر جار فۆڕمی خیانه‌ت گۆڕانی به‌سه‌ردا هاتووه‌: مێژووی بزوتنه‌وه‌ی رزگارییخوازیی گه‌لی کورد هه‌ر له‌سه‌رده‌می میرنشینه‌کانه‌وه‌ خاڵیی نه‌بووه‌ له‌ خیانه‌ت! به‌پێی قۆناغه‌ جیاوازه‌کانی خه‌باتی رزگارییخوازیی  کورد فۆڕمه‌که‌ی گۆڕانی به‌سه‌ردا هاتووه‌‌، هه‌ر گرووپ و خێڵێک هێزێکی سیاسیی به‌ فۆڕمی جیاواز خیانه‌تی نیشتمانییان به‌رهه‌م هێناوه‌‌ یان خیانه‌تی سیاسیی یان کردوه‌. ئه‌گه‌ر سه‌رنجی مێژووی نوێ بده‌ین، به‌تایه‌تیی ئه‌و رووداوه‌ سیاسییانه‌ی له‌دوای شۆڕشی ئه‌یلول له‌ باشووری کوردستان روویان داوه‌، دیاره‌: مه‌سه‌له‌ی رووداوی 31ی ئاب و شه‌ڕی ناوخۆ و مه‌سه‌له‌ی هێنانی سوپای تورکیا و سوپای ئێران بۆ سه‌ر خاکی هه‌رێمی کوردستان، ئه‌مانه‌ له‌ دیارترین ئه‌و خیانه‌تانه‌ن که‌ له‌مێژووی نوێی کورددا روویانداوه‌.

میره‌، جه‌ختیکرده‌وه‌: ئه‌گه‌ر به‌دیاری کراویش بڵێین له‌ نێو ئه‌و سه‌رکرده‌ سیاسییانه‌ی کورددا که‌ ئێستا له‌ ژیانداماون، هیچ که‌سێک هێنده‌ی مه‌سعود بارزانیی خیانه‌تی نه‌کردوه‌ و به‌شداریی نه‌کردووه‌ له‌ خیانه‌تی نیشتیمانیی-دا! دیاره‌ خیانه‌ت کردن لای پارتیی و مه‌سعود بارزانیی فۆڕمێکی جیاوازه‌؟! ئه‌وان خیانه‌تیان له‌ چه‌مکی کوردایه‌تیی دا به‌ خه‌ڵکی کوردستان فرۆشتووه‌ته‌وه‌.

ئه‌و رۆژنامه‌نووسه‌، ئه‌وه‌شی هه‌ڵسه‌ندگاند، "هه‌ر بۆیه‌ ئه‌گه‌ر ئێمه‌ ریزبه‌ندی بکه‌ین له‌ نێو بنه‌ماڵه‌ سیاسییه‌کان له‌ کوردستاندا، ئه‌وا بێگومان بنه‌ماڵه‌ی بارزانیی گه‌وره‌ترین خیانه‌تی نیشتمانییان کردوه‌، ئه‌گه‌ر وه‌ک پارتیی-ش ریزبه‌ندیی بکه‌ین ئه‌وا پارتیی دێمۆکراتیی کوردستان زۆرترین خیانه‌تی کردوه‌؛ بێگومان هێزه‌کانی تریش خیانه‌تیان کردوه‌، به‌ڵام هیچ هێزێک هێنده‌ی پارتیی له‌ خیانه‌ته‌وه‌ نه‌گلاوه‌! ئه‌گه‌ر وه‌ک که‌سایه‌تییش مامه‌ڵه‌ی له‌گه‌ڵدا بکه‌ین، ئه‌وا له‌ مێژووی نوێی کورددا هیچ که‌سایه‌تییه‌ک هێنده‌ی مه‌سعود بارزانیی خیانه‌تی نیشتیمانیی نییه‌‌ نه‌کردوه‌‌.

ئه‌و، ئه‌وه‌شی خسته‌ڕوو که‌: شته‌که‌ دوو لایه‌نه‌، پارتیی بۆ جوانترکردنی وێنه‌ی خۆی هه‌میشه‌ پێویستیی به‌وه‌ هه‌یه‌ دوژمنی وه‌همیی و خیانه‌تکار دورستبکات،   ئه‌گه‌ر ئێمه‌ باسی مێژووی جاشایه‌تیی بکه‌ین له‌ باشووری کوردستان، له‌ شه‌سته‌کانی سه‌ده‌ی رابردووه‌ دوای ئه‌وه‌ی خوا لێخۆش بوو مه‌لا مسته‌فا، وه‌کو که‌سی یه‌که‌م له‌ ناو بزوته‌نه‌وه‌ی رزگارییخوازیی گه‌لی کورددا ده‌رکه‌وت؛ به‌شی زۆری سه‌رۆک عه‌شیره‌ته‌کانی پاڵنا بۆئه‌وه‌ی بچنه‌ ناو حکومه‌تی عێراقیی و ناسناوی جاشێتیی خسته‌ پاڵیان. کولتووری به‌ خیانه‌تکردن لای پارتیی مێژوویه‌کی ده‌وڵه‌مه‌ندی هه‌یه‌! پارتیی پێوستییه‌کی مێژوویی و سیاسیی به‌م ئیدیۆمه‌ هه‌یه‌، بۆ پارتیی زۆر گرینگ بوو هێزێکی تری سیاسیی هه‌ڵگری ئه‌م جۆره‌ ناسنامه‌یه‌ بێت و پێیببه‌خشرێت، بۆ شاردنه‌وه‌ی خیانه‌ته‌ گه‌وره‌کان، بۆ نموونه‌ جێی سه‌رسوڕمانی مێژووییه‌ هێزێک خاوه‌نی خیانه‌تی گه‌وره‌ی31ی ئاب بێت باسی خیانه‌ت بکات؟! سه‌ره‌تاو کۆتایی خیانه‌ت له‌ مێژووی کوردایه‌تیی دا پێموایه‌ پارتیی به‌رپرسی یه‌که‌مه‌.

ئه‌و، ره‌هه‌نده‌کانی خیانه‌ت ده‌خاته‌روو: چه‌ند ره‌هه‌ندێکی هه‌یه‌، ره‌هه‌ندی یه‌که‌م پێوه‌ندیی به‌ لاوازیی که‌سایه‌تیی کورده‌وه‌ هه‌یه‌، پێوه‌ندیی به‌سه‌رکرده‌ سیاسییه‌کانی کورده‌وه‌ هه‌یه‌ که‌ بۆ به‌رژه‌وه‌ندیی ماددیی، حیزیی و مه‌بادیئو پرانسییپه‌کانی خۆیان فرۆشتووه‌! ئینجا سه‌رنجی ئه‌و فایلانه‌ موغابه‌راتیانه‌ بدرێت که‌ دوای که‌وتنی سه‌دام له‌ ده‌سگا موغابه‌راتییه‌کان بڵاوبوونه‌وه‌. له‌وه‌دا که‌م سه‌رکرده‌ی کورد و پارتیی سیاسیی کوردیی به‌ پاکیی ده‌رچووه‌! له‌به‌ر ئه‌وه‌ی لاوازیی که‌سایه‌تیی سیاسیی هه‌میشه‌ پڵنه‌ربووه‌ بۆ به‌رهه‌م هێنانی خیانه‌تی سیاسیی، ئه‌مه‌یش وایکردوه‌ که‌ به‌ر خودان ئه‌وه‌ی له‌سه‌رده‌می شاخدا پێده‌وترا پێشمه‌رگایه‌تیی کاڵببێته‌وه‌، له‌به‌رئه‌وه‌ی پێشمه‌رگایه‌تیی و به‌رخودان پێوستیی به‌که‌سایه‌تیی به‌هێز هه‌یه‌ که‌ به‌رژه‌وه‌ندییه‌کانی خۆی ده‌کاته‌ قوربانیی له‌ پێناو به‌رژه‌وه‌ندیی گشتییدا، به‌ڵام خیانه‌ت کاره‌ژکان به‌رژه‌وه‌ندیی گشتیی ده‌که‌نه‌ قوربانیی به‌رژه‌وه‌ندیی بنه‌ماڵه‌یی، بۆ نموونه‌ باسیی خیانه‌تی 31ی ئاب ده‌که‌یت پارتیی پێوابوو که‌ وه‌ک هێزێکی سیاسیی په‌رشوبڵاو بووه‌ و لاواز بووه‌ بۆ قه‌ره‌بوو کرنده‌وه‌ی په‌نای برده‌ به‌ر خیانه‌تی 31ی ئاب، ئه‌وان خیانه‌ت ده‌که‌ن بۆ مانه‌وه‌ ناشی شارنه‌وه‌ ئه‌وان هێزێکن هاتوون بمێننه‌وه‌ و هه‌موو رێگایه‌کی ناشه‌رعیش ده‌گرنه‌به‌ر بۆ مانه‌وه‌ و بۆ پارتیی وبنه‌ماڵه‌ی بارزانیی گرینگ نییه‌ چۆن ده‌مێنیته‌وه‌ گرینگ ئه‌وه‌یه‌ بمێنیته‌وه‌.

 

 

 

 

 

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: