گۆشه‌ی ئازاد

رژێمی ئێران؛ له‌نێوان به‌رداشی خۆپیشاندانی جه‌ماوه‌ری و گه‌مارۆ ده‌ره‌كیه‌كان

ئامه‌د شاهۆ

 

له‌ئێران ته‌نیا گه‌ل ئۆپۆزسیۆنی راسته‌قینه‌یه‌‌

شه‌ڕی جیهانی سێهه‌م له‌ناوچه‌كه‌ تا ده‌ڕوات قووڵتر و تێپه‌ڕی قۆناخێكی دژوارتر ده‌بێت. ئێران لایه‌نێكی سه‌ره‌كی ئه‌و هێزانه‌یه‌ كه‌ له‌قووڵكردنه‌وه‌ی شه‌ڕ و توندوتیژی و ئاڵۆزیه‌كانی ناوچه‌كه‌ پشكی شێری به‌ركه‌وتووه‌. ئامانجی ده‌سه‌ڵاتدارانی ئێران ئه‌وه‌یه‌ كه‌ له‌داڕشتنه‌وه‌ی رۆژهه‌ڵاتی ناوینی نوێ‌، پێگه‌و هه‌ژمونی خۆی له‌ناوچه‌كه‌ بپارێزێت و له‌پێناو گه‌هێشتن به‌و ئامانجه‌ش، گه‌وره‌ترین كۆسپ و ته‌گه‌ره‌ له‌به‌رده‌م ده‌سته‌به‌ركردنی ناسنامه‌ی ئازاد و مافی ره‌وای گه‌لانی ژێرده‌ستی ناوچه‌كه‌ و به‌ تایبه‌ت چاره‌سه‌ری پرسی كورد دروست كردووه‌و له‌ژێر ده‌مامكی مه‌زهه‌ب و ئایینه‌وه‌ له‌په‌رته‌وازه‌كردن و قووڵ كردنه‌وه‌ی ناكۆكی نێوان گه‌لان سیاسه‌تێكی مه‌ترسیدار به‌ربڵاو ده‌كات. شاڵاوی ئاڵوگۆڕه‌كانی داهاتوو به‌ ده‌ستێشخه‌ری هێزی گه‌ل، هه‌ژموونی و باڵاده‌ستی كاربه‌ده‌ستانی رژێم له‌ناو ده‌بات‌‌، له‌ئێستاوه‌ ترس و دڵه‌ڕاوكێ‌ له‌دڵیان نیشتووه‌.

كاربه‌ده‌ستانی رژێم ئه‌گه‌ر بوێرانه‌ دان به‌ ماف و چاره‌نووسی دیموكراتیانه‌ی گه‌لانی ئێران دا بنێن و گه‌ره‌نتی چاره‌سه‌ركردنی سه‌رجه‌م كێشه‌كانیان بكه‌ن و به‌ده‌م ویست و داخوازیه‌كانیانه‌وه‌ بڕۆن، ئه‌وا له‌شه‌ڕ و قووڵ كردنه‌وه‌ی قه‌یرانی ناوخۆیی خۆی رزگار ده‌كات، به‌ڵام ئه‌گه‌ر به‌ پێچه‌وانه‌وه‌ درێژه‌ به‌ سه‌ركوت و چه‌وسانه‌وه‌و به‌ڵێنی بێ‌بنه‌ما و ملیتاریزه‌كردنی كۆمه‌ڵگه‌و گرنگی به‌ رێكخستن كردنی هێزی چه‌كداری سوپای پاسداران و سوپای قودس چ له‌ناوخۆ و ده‌ره‌وه‌ی سنووره‌كانی خۆی و درێژه‌ به‌ ده‌ستێوه‌ردانی وڵاتانی ناوچه‌كه و تیرۆر‌ بدات، شه‌ڕێكی ماڵوێرانكه‌ر و بێ‌كۆتا به‌رۆكی ئێران ده‌گرێته‌وه‌ كه‌ ده‌رئه‌نجامی له‌سوریا و ئێراق خراپتر و به‌ رووخانی رژێم به‌ ئه‌نجام ده‌بێت. له‌به‌ر حكومڕانی سه‌قه‌تی كاربه‌ده‌ستانی ئێران ئایینده‌ی ئه‌و وڵاته‌ به‌ره‌و داهاتوویه‌كی مه‌ترسیدار و قه‌یراناوی ده‌ڕوات كه‌ له‌بوومه‌له‌رزه‌یه‌كی سیاسی و سه‌ربازی دژوارتر ده‌بێت. چون ئێران به‌ جێگای سه‌قامگیری ئاشتی، دیموكراسی و دادپه‌روه‌ری؛ هزری تیرۆر، شیعه‌گه‌رایی ده‌وڵه‌تی، پێشێل كاری مافی مرۆڤ، نژادپه‌ره‌ستی، پارچه‌گه‌رایی و داگیركاری بڵاو كردووه‌ كه‌ كۆی ئه‌وانه‌ به‌رۆكی خودی رژێم ده‌گرێته‌وه‌. كۆماری ئیسلامی ئێران سه‌ره‌ڕای ئه‌وه‌ی هه‌ست به‌ باڵاده‌ستی له‌ناوچه‌كه‌ ده‌كات، له‌ئاستی ده‌ره‌وه‌و ناوخۆ له‌دۆخێكی زۆر ناله‌بار و ناسه‌قامگیر به‌سه‌ر ده‌بات. له‌به‌ر نه‌رمشه‌ قاره‌مانانه‌كانی له‌سیاسه‌تی ناوخۆیی، ناوچه‌یی و جیهانی ته‌نگاو و له‌بن به‌ستدایه‌. بۆیه‌ ئیدی پێناسه‌ی دوورگه‌یه‌كی ئارام و سه‌قامگیری ناوچه‌كه‌ بۆ ئێران له‌لایه‌ن كاربه‌ده‌ستانی رژێمه‌وه‌ واتای خۆی له‌ده‌ست ده‌دات و ئێران ده‌بێته‌ دوورگه‌یه‌كی نائارام و ناپایه‌دار له‌ناوچه‌كه‌. له‌ئاستی هه‌رێمی و جیهانی به‌ پێكهێنانی ناتۆی عه‌ره‌بی و هاوپه‌یمانی جیهانی دژ به‌ ئێران، رووبه‌ڕووی گه‌مارۆیه‌كی توندی ئابووری، سیاسی و دیبلۆماسی ده‌بێته‌وه‌‌و له‌ئاستی ناوخۆیش رووبه‌ڕووی كه‌لێنی قووڵ و ناكۆكی نێوان ده‌زگا و باڵه‌كانی ده‌سه‌ڵات و كاربه‌ده‌ستانی رژێم بووه‌ته‌وه‌ و له‌ئاستی جه‌ماوه‌ریشدا رووبه‌ڕووی زنجیره‌ سه‌رهه‌ڵدان، بایكۆت و ناڕه‌زایی توندی خه‌ڵك بووه‌ كه‌ به‌ فۆڕم و شێوازی رادیكاڵتر درێژه‌ی ده‌بێت. ئه‌وه‌ش كاربه‌ده‌ستانی رژێم ناچار به‌وه‌ ده‌كات كه‌ له‌به‌رامبه‌ر ئیراده‌ی گه‌ل كڕنوش به‌رن و رێز له‌داخوازیه‌ ره‌واكانيان بگرن.

دۆخی ئێران نیشان ده‌دات كه‌ رۆژ له‌دوای رۆژ ململانێ و ناكۆكی سیاسی نێوان كاربه‌ده‌ستان و باڵه‌كانی رژێم و ناڕه‌زایی جه‌ماوه‌ری و خۆپیشاندانی سه‌رتاسه‌ری له‌ئێران به‌رفراوانتر ده‌بێ و رژێم رووبه‌ڕووی شڵه‌ژان و ترازان له‌ره‌وتی ئاسایی خۆی ده‌بێت. هاوپێچی ئه‌وه‌ش له‌به‌ر رێك و پێكی نوێ‌ جیهانی و مه‌ودای به‌رفراوانی عه‌قلیه‌ت و لۆژیكی رژێم له‌گه‌ڵ ره‌وتی جیهانی دا، تواناو ده‌سه‌ڵاتی به‌ره‌نگاربوونه‌وه‌ و دۆزینه‌وه‌ی رێگا چاره‌یه‌ك بۆ هیچ جۆره‌ كێشه‌یه‌كی ئابووری، سیاسی و كۆمه‌ڵایه‌تی نه‌ماوه‌ و له‌نێو ئاپۆڕای جه‌ماوه‌ر و ئاستی نێوده‌وڵه‌تیش دا شه‌رعیه‌تی له‌ده‌ست داوه‌. بۆیه‌ له‌جوگرافیای ئێران و سنووری ده‌سه‌ڵاتداری رژێم، قه‌یران له‌دوای قه‌یران قارچ ئاسا سه‌رهه‌ڵده‌دات و ئۆتۆریته‌ و هه‌ژمونی ئێران له‌به‌ر چاو رای گشتی له‌ناو ده‌چێت.

گه‌لانی ئێران دژ به‌ سیاسه‌ته‌كانی كۆماری ئیسلامی ناو به‌رخودان دان. له‌ئاستی ده‌ره‌وه‌ كار له‌سه‌ر ئه‌وه‌ ده‌كرێت كه‌ ناكۆكی نێوان به‌ده‌نه‌ی حكومڕانی ئێران قووڵتر بكرێت. بۆ ئه‌وه‌ی ناكۆكیه‌كان زیاتر قووڵ نه‌بن، ریفۆرمخوازه‌كان له‌كاتی خۆپیشاندانه‌كانی به‌فرانباری ساڵی رابردوو پشتگیری ده‌وڵه‌ت و بناژۆخوازه‌كانیان گرت و ئه‌وه‌ش سه‌لماندی كه‌ له‌ئێران دا هێزی دژبه‌ر و ریفۆرمیست و میانڕه‌و بوونی نییه‌، به‌ڵكوو هه‌موویان له‌قاڵبێكی به‌ ناو بناژۆخواز كه‌ توندڕه‌و میانڕه‌ون، له‌لایه‌ن جه‌ماوه‌ره‌ی ناڕازییه‌وه‌ پێناسه‌ كران. دیاره‌ له‌ئێران ته‌نیا گه‌ل ئۆپۆزسیۆنی راسته‌قینه‌‌و خاوه‌ن پڕۆژه‌ی دیموكراتیكه‌. واتا گه‌ل پێشه‌نگی سیاسه‌تی دیموكراتیك ده‌كات. بۆیه‌ ده‌سه‌ڵات و هێزه‌ ده‌ره‌كیه‌كان و حه‌تا به‌شێك به‌ناو هێزه‌كانی دژبه‌ری رژێم ده‌یانه‌وێت وزه‌ی ناڕازی گه‌ل به‌ره‌و قازانجی خۆیان رابكێشن.

 

دیموكراسی ده‌سته‌واژه‌یه‌كه‌ ته‌نیا‌ له‌لایه‌ن خودی گه‌لانی ئێران ده‌سته‌به‌ر ده‌كرێت

 سه‌رهه‌ڵدانی به‌رفراوانی زیاتر له‌ 100 شار و پارێزگاكانی خه‌ڵكی ئێران له‌مانگی به‌فرانباری ساڵی 1396ی هه‌تاوی په‌رده‌یان له‌سه‌ر كارنامه‌ی ديماگۆژیانه‌ی خه‌باتی 40 ساڵه‌ی ده‌سه‌ڵاتدارانی كۆماری ئیسلامی ئێران‌ هه‌ڵدا و به‌ وتنه‌وه‌ی دروشمه‌كانی؛ (نه‌مان بۆ خامنه‌یی، نه‌مان بۆ رژێمی ویلایه‌تی موتله‌قه‌ی فه‌قیه‌، ده‌ست له‌سوریا به‌رده‌ن، فیكرێك به‌ حاڵمان بكه‌ن و نا بۆ ده‌ستێوه‌ردانی ده‌ره‌كی) مه‌شروعیه‌تی رژێميان خسته‌ ژێر پرسیاره‌وه‌. ئه‌و سه‌رهه‌ڵدان تابلۆ دروست كراوه‌كانی ناو كۆمه‌ڵگه‌یان تێكشكاند و ترس و دڵه‌ڕاوكێ‌یان له‌چه‌كدارانی رژێم روانده‌وه‌. به‌رده‌وامی بوركان و شه‌پۆلی ناڕه‌زایی گه‌ل تا به‌ ئه‌مڕۆ به‌ میتۆدی جیاواز له‌سه‌رجه‌م شاره‌كانی ئێران و رۆژهه‌ڵاتی كوردستان نیشانده‌ری تووڕه‌یی مێژوویی خه‌ڵكی ئێران له‌سیاسه‌تی سه‌ركوتكاری و چه‌وسانه‌وه‌و له‌ده‌ستدانی هێزی سه‌ركوتكاری كاربه‌ده‌ستانی رژێمه‌. رۆڵ گێڕان و به‌شداری كردنی سه‌رجه‌م پێكهاته‌و ناسنامه‌ جیاوازه‌كانی كۆمه‌ڵگه‌، هاوده‌نگی، یه‌كگوتاری و یه‌كریزی نێوان گه‌لان، چه‌خماخه‌ی شۆڕشی ئازادیخوازی دژ به‌ نادادپه‌روه‌ری و ده‌سه‌ڵاتی ره‌های كۆماری ئیسلامی لێداو و رژێم به‌ره‌و وه‌رچه‌رخانێكی نوێ‌ پاڵ ده‌درێت. دوابه‌دوای خۆپیشاندانه‌كانی به‌فرانباری ساڵی رابردوو، شاهیدی ئه‌وه‌ین كه‌ رۆحی ئه‌و قۆناخه‌ له‌جه‌سته‌ی زامداری گه‌لان به‌ خۆڕاگری زیندانیانی سیاسی و مانگرتن له‌به‌ندیخانه‌كان، مانگرتن و سه‌رهه‌ڵدانی كرێكاری، سه‌رهه‌ڵدانی بزووتنه‌وه‌ی كچانی شه‌قامی شۆڕشی تاران، رژانه‌ سه‌ر شه‌قام و پێكدادانی چه‌ند رۆژه‌ی خه‌ڵكی كازروون له‌گه‌ڵ هێزه‌ ئه‌منیه‌كان، پیرۆزكردنی به‌خرۆشی نه‌ورۆز و خاوه‌ندارێتی له‌پرسی عه‌فرین له‌لایه‌ن جه‌ماوه‌ری كوردستان، به‌ هاناچوونی گه‌لانی گشتی ئێران بۆ لێقه‌وماوانی بوومه‌له‌رزه‌كه‌ی پارێزگاری كرماشان، بایكوت كردن و داخستنی دووكانه‌كانی بانه‌ و به‌شێك له‌شاره‌كانی تری رۆژهه‌ڵاتی كوردستان، ناڕه‌زایی دژ به‌ سووكایه‌تی ده‌نگ و ره‌نگی كۆماری ئیسلامی له‌مه‌ڕ سووكایه‌تی كردن به‌ گه‌لی عه‌ره‌بی ئه‌هواز، ناڕه‌زایی دژی مامۆستایه‌كی زانكۆ له‌به‌ر سووكایه‌تی كردن به‌ خوێندكاران و گه‌لی به‌لووچ و هه‌ره‌ دوایی مانگرتنی چه‌ند رۆژه‌ی شۆفیری بارهه‌ڵگره‌كانی زیاتر له‌70 شار و پارێزگای ئێران و رۆژهه‌ڵاتی كوردستان له‌دژی گرانبوونی پارچه‌ی سه‌یاره‌ی بارهه‌ڵگر و زیاد وه‌رگرتنی باج به‌رده‌وامه‌.

زۆرینه‌ی مانگرتن، داخستنی پاساژ و دوكانه‌كان و خۆپیشاندانه‌ سه‌رتاسه‌ریه‌كانی سه‌رجه‌م چین و پێكهاته‌كانی ئێران دژ به‌ سیاسه‌تی نادیموكراتیك و فاشیستیانه‌ی كاربه‌ده‌ستانی رژێم و سیاسه‌تی هه‌ڵاواردن، گرانی و گه‌نده‌ڵی ماڵی و خه‌مساردی و مامه‌ڵه‌كردنی بێ‌به‌رپرسیارانه‌ی به‌رپرسانی رژێم له‌هه‌مبه‌ر دۆخی خراپی ئابووری روویانداوه‌. به‌شێك له‌ هۆكاره‌ سه‌ره‌كیه‌كه‌شی بۆ زیادكردنی له‌ سه‌دا چلی بوودجه‌ی سوپای پاسداران و داهاتی وڵات سه‌رفی شه‌ڕی هێزه‌ به‌كرێگیراوه‌كانی رژێم له‌سوریا، یه‌مه‌ن، لوبنان و عێراق و داته‌پیوی ئابووری و هه‌ره‌س هێنانی دراوی ئێران و هه‌ڵكشانی نرخی دۆلار له‌و وڵاته‌ ده‌گه‌ڕێته‌وه‌. ئه‌و دۆخه‌ش ماوه‌یه‌كه‌ به‌ جددی كۆماری ئیسلامی تووشی گرفت و كێشه‌ی گه‌و‌ره‌ كردووه‌، كه‌ له‌به‌ر بێ‌پڕۆژه‌یی و بێ‌چاره‌سه‌ر كردنیان، هه‌ر جارێك له‌شارێك و له‌لایه‌ن نه‌ته‌وه‌و پێكهاته‌یه‌كه‌وه‌ پێشه‌نگایه‌تی مانگرتن و چالاكی مه‌ده‌نیانه‌ ده‌كرێت. لێره‌دا گه‌لانی ئێران دژی سیاسه‌تی تۆقاندن و له‌سێداره‌دان و برسی كردن، زمانی دیموكراسی به‌ گوێ كاربه‌ده‌ستانی ئێران ده‌خوێنن. واتا چالاكی زمانی دیموكراسییه‌ كه‌ ئه‌مڕۆ گه‌لانی ئێران به‌ ده‌ستپێشخه‌ری گه‌لی كورد له‌جوگرافیای هاوبه‌شی گه‌لان په‌ره‌ به‌ چه‌سپاندنی دیموكراسی له‌ناوخۆ ده‌ده‌ن. واتا دیموكراسی نه‌ ده‌سته‌واژه‌یه‌كی ده‌ره‌كییه‌ كه‌ له‌ده‌ره‌وه‌ی سنووره‌كانی ئێران هاورده‌ی ناوخۆ بكرێت و نه‌ ده‌سته‌واژه‌یه‌كه‌ كه‌ به‌ عه‌قلیه‌تی ئێستای كاربه‌ده‌ستانی ئێران ده‌سته‌به‌ر ببێت، به‌ڵكوو له‌لایه‌ن خودی گه‌لانی ئێران ده‌سته‌به‌ر ده‌كرێت.

ئه‌و دۆخه‌ سه‌لمێنه‌ری ئه‌وه‌یه‌ كه‌ رژێم هه‌ر رۆژ به‌ قه‌یرانێكی نوێوه‌ رووبه‌ڕوو ده‌بێت و به‌ جێگای چاره‌سه‌ری دیموكراتیانه‌و سه‌قامگیری ئاشتی و ئارامی، قووڵ كردنه‌وه‌ی قه‌یرانه‌كان و گرژی و ئاڵۆزی خه‌ڵاتی گه‌لانی ئێران ده‌كات و له‌به‌ر ئه‌وه‌ش گه‌لانی ئازادیخوازی ئێران له‌ده‌ره‌وه‌ی كۆماری ئیسلامی لێگه‌ڕین یان به‌دوای ئه‌ڵته‌رناتیڤێكی نوێ ژیان و به‌ڕێوه‌به‌رایه‌تی دیموكراتیانه‌ هه‌یه‌. چۆن په‌یامی گه‌لان له‌خۆپیشاندانه‌كاندا به‌ زه‌قی به‌رجه‌سته‌ ده‌بێت كه‌ گه‌لان نه‌ له‌گه‌ڵ ئه‌و سیسته‌مه‌ن كه‌ ئێستا حكومداری سه‌ر گه‌لان ده‌كات و نه‌ له‌گه‌ڵ ده‌ستێوه‌ردانی هێزه‌ ده‌ره‌كیه‌كانیشن. واته‌ بژارده‌ی گه‌ل، هێڵی دیموكراسی یان هێڵی سێهه‌مه‌ كه‌ ئیراده‌ی گه‌وهه‌ری گه‌ل تێدا زاڵ بێت و له‌به‌ڕێوه‌بردنی وڵاتدا گه‌ل مافی دیاریكردنی چاره‌نووس و خۆبه‌ڕێوه‌بردنی خۆی هه‌بێت.

 

پرسی به‌رجام له‌نێو به‌رپرسانی باڵای ئێران گرژی و ئاڵۆزیه‌كان زیاتر ده‌كات

به‌شێك له‌ته‌نگه‌تاوبوونی رژێمی كۆماری ئیسلامی ئێران له‌لایه‌ن زلهێزه‌ جیهانیه‌كانه‌وه‌ ده‌گه‌ڕێته‌وه‌ بۆ سه‌رده‌می سه‌رۆك كۆماری ئه‌حمه‌دی نژاد كه‌ له‌به‌ر سیاسه‌تی ملیتاریستی و بناژۆخوازانه‌ی، گوشار و گه‌مارۆی قورسیان به‌ سه‌ر رژێمدا سه‌پاندو ئێستاش جارێكی تر له‌به‌ر په‌ره‌پێدانی هه‌مان سیاسه‌ت له‌لایه‌ن خامنه‌یی و سوپای پاسدارانه‌وه‌، له‌ناوخۆی وڵات و ده‌ره‌وه‌ی سنووره‌كانی ئێران، گوشار و گه‌مارۆكان له‌لایه‌ن ئیداره‌ی نوێ‌ ترامپه‌وه‌، تێپه‌ڕی قۆناخێكی دژوارتر بوویه‌وه‌. كۆماری ئیسلامی له‌سه‌رده‌می سه‌رۆك كۆماری حه‌سه‌ن رۆحانی به‌ ده‌ستپێكردنی دانوستاندن و رێكه‌وتنی به‌رجام بۆ به‌رنامه‌ی ناوه‌كی له‌گه‌ڵ زلهێزه‌ جیهانیه‌كان ویستی له‌قه‌یران و گێژاوی رۆژهه‌ڵاتی ناوین خۆی قوتار بكات و هه‌ژموونی خۆی له‌ شه‌ڕ و ئاڵۆزیه‌كانی رۆژهه‌ڵاتی ناوین بپارێزێت. به‌ڵام له‌به‌ر قووڵ بوونی ناكۆكی ناوخۆیی و شه‌ڕی ده‌سه‌ڵات و زه‌بری گه‌مارۆ ده‌ره‌كیه‌كان پیلان و به‌رنامه‌ی داگیركاری رژێمی ئێران مایه‌پووچ ده‌بێته‌وه‌.

هاتنه‌ سه‌ر كاری ترامپ و گۆڕانكاری له‌به‌ڕێوه‌به‌ری سیاسی ئه‌مریكا ئاشكرا بوو كه‌ رێكه‌وتنی ئه‌تۆمی 5 + 1 داوێك بووه‌ بۆ راكێشانی كۆماری ئیسلامی ئێران به‌ره‌و دووڕیانی راده‌ست بوون یان شه‌ڕه‌وه‌. پرسی به‌رجام له‌نێو به‌رپرسانی باڵای ئێران گرژی و ئاڵۆزیه‌كان زیاتر ده‌كات و ده‌مه‌قاڵه‌ و تۆمه‌تباركردنی یه‌كدی و درزی نێو كاربه‌ده‌ستان زیاتر ده‌كات. سوپای پاسداران و بناژۆخوازه‌ توندڕه‌وه‌كان ده‌یانه‌وێت ئه‌و ده‌رفه‌ته‌ له‌به‌رژه‌وه‌ندی خۆیان بقوازنه‌وه‌. واتا له‌ژێر رێكه‌وتنی په‌رده‌ی به‌رجام له‌لایه‌ن حكومه‌تی رۆحانیه‌وه‌ كوده‌تایه‌ك دژ به‌ حه‌سه‌ن رۆحانی و بناژۆخوازه‌ میانڕه‌وه‌كان ئه‌نجام بده‌ن و سه‌رتاپای وڵات له‌لایه‌ن سوپای پاسدارانه‌وه‌ به‌ڕێوه‌ ببه‌ن، كه‌ ئه‌وه‌ش به‌ واتای ده‌ربازبوونی شه‌ڕی جیهانی بۆ قۆناخێكی نوێتر ده‌بێت. هه‌ر چه‌ند له‌به‌شێك له‌میدیا و كه‌سایه‌تیه‌ ناوخۆییه‌كانی رژێم بانگه‌شه‌ی ئه‌وه‌ ده‌كه‌ن كه‌ قاسم سوله‌یمانی فه‌رمانده‌ی گشتی سوپای قودس ده‌بێته‌ سه‌رۆك كۆماری داهاتووی ئێران. واتا خامنه‌یی و سوپای پاسداران ده‌رفه‌ت بۆ هه‌ژمونی خۆیان خۆش ده‌كه‌ن كه‌ باڵ بكێشنه‌ سه‌ر كۆی حوجره‌كانی كۆمه‌ڵگه‌ی ئێران. له‌ئه‌گه‌ری هاتنه‌ ئارای ئه‌و دۆخه‌ ئێران هاوشێوه‌ی كوده‌تای نافه‌رجامی توركیا له‌ساڵی 2016 روویدا، له‌ژێر ناوی پاراستنی به‌رژه‌وه‌ندی وڵات، شه‌پۆلێكی سه‌ركوت، گرتن و له‌سێداره‌دانی چالاكانی مه‌ده‌نی و هێزه‌ چه‌پگه‌ر و ئازادیخوازه‌كان ده‌ستپێده‌كات و فاشیزم و دیكتاتۆریه‌ت له‌جوگرافیای ئێران به‌ربڵاو ده‌بێت. هاوكات شه‌ڕی جیهانی سێهه‌م تێپه‌ڕی قۆناخ و فازێكی نوێ ده‌بێت كه‌ ئێران ده‌بێته‌ به‌ره‌یه‌كی نوێ شه‌ڕه‌كه‌وه‌.

 

ئێران له‌گۆڕه‌پانی شه‌ڕی جیهانی سێهه‌م به‌ ته‌نیا ده‌مێنێته‌وه‌

 كشانه‌وه‌ی ئه‌مریكا له‌پرسی به‌رجام قۆناخێكی نوێ‌ دژ به‌ ئێران له‌هه‌رێمه‌كه‌ به‌دوای خۆی هێنا و له‌یه‌كه‌م هه‌نگاودا گه‌مارۆ ئابووریه‌كانی سه‌ر ئێران توندتر و گشتگیرتر ده‌بنه‌وه‌ و گوشاره‌ نێوده‌وڵه‌تیه‌كان بۆ كشانه‌وه‌ی ئێران له‌لوبنان، یه‌مه‌ن، ئێراق و سوریا زیاتر ده‌بێت. هه‌ڕه‌شه‌و گوڕه‌شه‌كانی ئه‌مریكا و ئێران و هاوپه‌یمانه‌كانیان توندتر ده‌بنه‌وه‌. راگه‌یاندنی مانیفستۆی 12 خاڵی پمبئۆ بۆ سنوورداركردنی ئێران گورزێكی جه‌رگبڕانه‌ ده‌بێت. هاوشێوه‌ی ئه‌وه‌ش خامنه‌یی بۆ رزگاربوون له‌و هه‌ڕه‌شانه‌ی ئه‌مریكا مه‌رجی مانه‌وه‌ی له‌به‌رجه‌م 7 خاڵی خسته‌ به‌رده‌م یه‌كێتی ئه‌وروپا. به‌ڵام ئه‌وه‌ی كه‌ روونه‌ یه‌كێتی ئه‌ورپا هه‌رگیز له‌به‌ر ئێران به‌رژه‌وه‌ندیه‌كانی له‌گه‌ڵ ئه‌مریكا ناخاته‌ مه‌ترسییه‌وه‌و پشت له‌ئێران ده‌كات و ئێران له‌گۆڕه‌پانی شه‌ڕی جیهانی سێهه‌م به‌ ته‌نیا ده‌مێنێته‌وه‌. ئێستا ئێران له‌ناوچه‌كه‌ گۆشه‌گیر ده‌كرێت و ناكۆكیه‌كانی له‌گه‌ڵ وڵاتانی عه‌ره‌بی به‌ سه‌ركردایه‌تی عه‌ره‌بستان به‌ره‌و قووڵبوونه‌وه‌ ده‌چێت. شه‌ڕێ كه‌ له‌یه‌مه‌ن له‌نێوان عه‌ره‌بستان و ئێران له‌ئارادایه‌، له‌عێراق و لوبنان به‌ شێوازی كێبڕكێ سیاسی له‌گه‌ڵ ئه‌مریكا و عه‌ره‌بستان به‌ڕێوه‌ ده‌چێت و ئێران له‌گه‌ڵ ئه‌مریكا، عه‌ره‌بستان و وڵاتانی دیكه‌ی عه‌ره‌بی له‌شه‌ڕێكی ناڕاسته‌وخۆدان. ئێستا ئه‌مریكا، یه‌كێتی ئه‌وروپا و ئیسرائیل به‌ باشی ده‌زانن كه‌ ئه‌گه‌ر ره‌وتی ده‌ستێوه‌ردانی ئێران له‌رۆژهه‌ڵاتی ناوین كۆنتڕۆڵ نه‌كه‌ن یان ناچار به‌ پاشه‌كشێ نه‌كه‌ن، پڕۆژه‌ی رۆژهه‌ڵاتی ناوینی گه‌وره‌ تووشی شكست و داڕمان ده‌بێت. ئێستا ئێران له‌ناوچه‌كه‌دا ته‌نیا رووسیا بووه‌ته‌ هاوپه‌یمانی، ئه‌ویش نه‌ له‌پێناو پاراستنی به‌رژه‌وه‌ندی رژێمی ئێرانه‌، به‌ڵكوو روسیا له‌به‌ر دژایه‌تی له‌گه‌ڵ پڕۆژه‌ی رۆژهه‌ڵاتی ناوینی گه‌وره‌، تاكتیكی بووه‌ته‌ هاوپه‌یمان و سوود له‌هێزی ئێران وه‌رده‌گرێت، چونكه‌ روسیاش به‌ هه‌ژموونی ئێران له‌سوریا و ناوچه‌كه‌  دڵخۆش نییه‌.

 

پژاك بۆ سه‌رجه‌م هێزه‌ ئازادیخوازه‌كانی ناو ئێران وه‌ك هیوایه‌ك ده‌دره‌وشێته‌وه‌

دۆخی هه‌نووكه‌یی ئێران پێویستی پێكهێنانی به‌ره‌ی دیموكراسیخوازی نێوان سه‌رجه‌م گه‌لانی فه‌راهه‌م كردووه‌، یه‌كڕیزی و هاوئاهه‌نگی زیاتر نێوان هێزه‌ چه‌پگه‌ر و ئازادیخوازه‌كان پێویستیه‌كی سه‌رده‌میانه‌یه‌. پێویستی به‌وه‌ هه‌یه‌ كه‌ خۆپیشاندان و چالاكیه‌ مه‌ده‌نیه‌كان به‌ پلان و به‌رنامه‌ رێك بخرێن تا هیچ هێز و لایه‌نێك نه‌توانێت ئاقاری خۆپیشاندانه‌كان به‌ره‌و ئاراسته‌ی نادیار بگۆڕێت. پژاك و كۆدار له‌م قۆناخه‌ هه‌ستیاره‌ی ناوچه‌كه‌و ئێران به‌ ئاماده‌كردنی نه‌خشه‌ رێگایه‌یكی دیموكراتیانه‌ به‌ پشت به‌ستن به‌ پڕۆژه‌كانی رابردووی، خۆی به‌ به‌رپرسیار ده‌زانێت كه‌ له‌پێناو دۆزی ره‌وای گه‌لانی ئازادیخوازی ئێران و رۆژهه‌ڵاتی كوردستان ئه‌ركی مێژوویی سه‌رشانی راپه‌ڕێنێت و به‌ پێشخستنی پڕۆژه‌ی نه‌ته‌وه‌ی ـ دیموكراتیك، ئازادیی و دیموكراسی له‌سه‌رتاسه‌ری ئێران بۆ سه‌رجه‌م گه‌لان و پێكهاته‌كانی بخاته‌‌ گه‌ره‌نتییه‌وه‌.

له‌به‌ر ئه‌وه‌ی پژاك ته‌نیا خۆی به‌ پارتێكی كوردستانی قه‌تیس نه‌كردووه‌، ئێستا بۆ سه‌رجه‌م هێزه‌ ئازادیخوازه‌كانی ناو ئێران وه‌ك هیوایه‌ك ده‌دره‌وشێته‌وه‌. هاوكات پژاك له‌پێناو دیموكراتیزه‌كردنی ئێران و پێكهێنانی به‌ره‌ی دیموكراتیكی گه‌لانی ئێران، له‌سه‌ر بنه‌مای سیاسه‌تی دیموكراتیك، یه‌كێتی و هاوپه‌یمانی له‌گه‌ڵ هێزه‌كانی تر و گه‌لانی ناوخۆی ئێران به‌ پێویست ده‌بینێت و هه‌وڵه‌كانی له‌پێناو به‌دیهێنانی ئه‌و بابه‌ته‌ چڕتر و به‌رفراوانتر ده‌بێته‌وه‌. به‌ رای ئێمه‌ بۆ به‌دیهێنانی شۆڕشی كۆمه‌ڵایه‌تی و كلتووری له‌ئێران پێویستی به‌وه‌ هه‌یه‌ كه‌‌ نێوان هێزه‌ دیموكراتیخواز و نوێخوازه‌كان، یه‌كگرتن و هاوپه‌یمانی پێك بێت تا له‌م قۆناخه‌ مێژوویه‌دا، له‌مه‌ڕ یه‌كخستنی سه‌رجه‌م هێزه‌ دژبه‌ره‌كانی رژێم له‌ژێر ناوی به‌ره‌ی دیموكراتیكی گه‌لانی ئێران سه‌ركه‌وتن له‌مێژووی هاوچه‌رخی ئێران تۆمار بكه‌ین. هه‌روه‌ها به‌ ته‌شه‌نه‌پێدانی گوشاری جه‌ماوه‌ری، ئێران ناچاری مۆزاكره كردن له‌گه‌ڵ ئێراده‌ی ئازادیخوازی گه‌لانی ئێران دا بكرێت تا پرسی ده‌سته‌به‌ركردنی ئازادیی و دیموكراسی به‌رێگای ئاشتیانه‌و سه‌رده‌میانه‌ چاره‌سه‌ر ببێ.

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: