ڕاپۆرت

“جەوھەری ئۆپۆزیسیۆن ئەو تێڕوانینە فیکریانەیە ھەوڵی گۆڕین و باشترکردنی سیستم دەدەن”

ئا: F ئاسۆ جەوهەر

 

توێژەرانی فیکری سیاسیی رایدەگەیەنن، ئۆپۆزیسیۆن له‌ هه‌رێمی کوردستاندا به‌ شێوه‌ی کاردانه‌وه‌ دروست ده‌بن، بۆیه‌ پێش ئه‌وه‌ی بییر له‌ فیکری سیاسیی و بکه‌نه‌وه‌ بییر له‌ تۆڵه‌ ده‌که‌نه‌وه‌! هەر بۆیە ئۆپۆزیسیۆنی سیاسیی كاریگەر لەنێو حكومەت و دەرەوەی بوونێكی ئەوتۆی نەبووە و جەختیشدەکەنەوە: ئۆپۆزسیۆنبوون نیشاندانی ھەڵە و کەموکوڕیی دەستەڵات و دانانی میکانیزمی چارەسەرییە بۆ ئەو ھەڵە و کەموکوڕییانەی کە دەستەڵات دەیھێنێتە کایەوە.

Rebwar

رێبوار رەئوف ساڵح، خوێندکاری داکتۆرا له‌ "سیاسه‌تی کوردیی له‌ خۆهه‌ڵاتی ناوه‌ڕاست"-زانکۆی کامبریج، ئاماژە بۆ ئەوە دەکات "له‌ سیاسه‌تدا ئۆپۆزسیۆن پێک دێت له‌ پارتێک یان چه‌ند پارتێک، له‌ دژی حکومه‌ت یان پارتیی ده‌سه‌ڵات.‌ ئه‌م پارته‌ ئۆپۆزیسیۆنانه‌ ده‌بێت بییر و باوه‌ڕ یان ئایدیۆلۆجیای سیاسیی هه‌بێت که‌ بریتییه‌ له‌ کۆمه‌ڵێک بییر و باوه‌ڕ یان رێباز که‌ ده‌بێت ئه‌خلاقییه‌ن پێوه‌ی پابه‌ند بیت، له‌ رێگه‌یه‌وه‌ ئه‌وه‌ رونبەکەنە‌وه‌ که‌ چۆن ده‌بێ کۆمه‌ڵگە به‌ڕێوه‌ببرێت، چۆن حکومڕانییه‌کی ته‌ندروست پراکتیزه‌ ده‌کات."

 

رێبوار، بە ئازادیی کۆمەڵگەی راگەیاند: ئه‌م جۆره‌ پابه‌ند بوونه‌ له‌ لایه‌ن پارته‌ سیاسییە ئۆپۆزیسیۆنه‌کانی هه‌رێمی کوردستان به‌رچاو ناکه‌وێت چونکه‌ پارت و رێکخراوه‌ سیاسییەکانی پێش ئۆپۆزیسیۆن ئه‌م کاره‌یان جێبه‌جێ نه‌کردووه‌ و هاووڵاتیانیش ده‌نگیان پێده‌ده‌ن. بۆ نموونه‌، پارتیی دیموکرات ی کوردستان به‌س دیموکرات نییه‌! که‌چی هەڵگری ئەو چەمکەیە یان یه‌کێتیی نیشتمانیی کوردستان، یه‌کێتیی نییە، بەڵام ناوی یه‌کێتییشیان له‌ خۆیان ناوه‌. بۆیه‌ کاتێک پارته ئۆپۆزیسیۆنه‌کان ئه‌مه‌ ده‌بینن، تێده‌‌گه‌ن که‌ ئه‌وه‌ی به‌لای کۆمه‌ڵگه‌وه‌ گرینگ نییه‌ فیکری سیاسیی پارتەکانە.‌ کوردستان نه‌یتوانیوه‌ ئه‌و دواکه‌وتویی و ناهۆشیارییه‌ی که‌ گه‌لانی رۆژهه‌ڵاتی ناوه‌ڕاست پێوه‌ی ده‌ناڵێنن تێپه‌ڕێنێت، به‌ تایبه‌ت له‌ دونیای سیاسه‌تدا. ته‌نانه‌ت ده‌توانین بیشڵێین که‌ ئه‌وه‌ گه‌ل و وڵاته‌ دواکوتووه‌کانیشه‌ له‌ ناوچه‌که‌دا سیاسه‌تی کوردیی به‌ڕێوه‌ ده‌به‌ن و ته‌حه‌کومی پێوه‌ ده‌که‌ن. بۆ نموونه‌، کاریگه‌ریی ده‌سه‌ڵاتدارانی سعودیه‌ و ئێران و تورکیا به‌ روونیی به‌سه‌ر سیاسه‌توانانی کورده‌وه‌ له‌ هه‌رێمی کوردستاندا دیاره‌، ئه‌م ئارگومێنته‌ به‌سه‌ر ئه‌زمونی کوردانی سوریادا جێبه‌جێ نابێت، چونکه‌ ئه‌وان به‌ڕاستیی نموونه‌یه‌کی جیاواز پێشکه‌ش ده‌که‌ن هه‌ربۆیه‌ هه‌موو هێزه‌ دواکه‌وتووه‌کانی ناوچه‌که‌ دژیانن، به‌وانه‌ی هه‌رێمی کوردستانیشه‌وه‌.

 

ئەو، وتیشی: له‌ دونیای دیموكراسییدا هه‌ڵبژردن هه‌یه‌، ئاشکرایه‌ که‌ زۆری ژماره‌ی کورسی له‌ پارلماندا گرینگه‌، ئه‌مه‌ وای کردووه‌ که‌ به‌ لای که‌سان و پارتیی سیاسیی هه‌رێمه‌وه‌ ته‌نها ژماره‌ی کورسی گرینگ بێت، ته‌نانه‌ت به‌ لایشیانه‌وه‌ گرینگ نییه‌ که‌ چۆن ئه‌م ئامانجه‌ ده‌پێکن، بۆیه‌ ده‌بینیت له‌ هه‌ڵبژاردنه‌کاندا ئه‌و هه‌موو ته‌زویراته‌ ده‌کرێت، دیاره‌ ئه‌گه‌ر پارتیی سیاسیی ئه‌خلاقییه‌ن پابه‌ند بێت به‌ فیکری سیاسییەوه‌ رێگه‌ به‌ خۆی نادات به‌ ڕێگه‌ی ناڕه‌وا ده‌نگ به‌ده‌ست بێنێت. بۆیه‌ ئه‌و که‌س و پارته‌ سیاسییانه‌ سودیان له‌ ئاستی نزمی تاک و کۆمه‌ڵگه‌ بینیوه‌ و پێویستییان به‌ فیکر و ئایدیۆلۆجیای سیاسیی نییه‌ بۆ ئه‌وه‌ی ده‌نگی پێبه‌ده‌ست بێنن. ده‌کرێت پرسیاری ئه‌وه‌ دروست ببێت که‌ ئایه‌ بۆچی ئه‌و پارته‌ سیاسییانه‌ی دروست ده‌بن و وه‌کو ئۆپۆزیسیۆن دێنه‌ پێشه‌وه‌ هه‌وڵ ناده‌ن ئاستی هۆشیاری و فیکری سیاسیی به‌رزیان هه‌بێت. وه‌ڵامی ئه‌م پرسیاره‌ ده‌کرێت ئه‌وه‌ بێت که‌ ئۆپۆزیسیۆن بوون له‌ هه‌رێمی کوردستاندا به‌ شێوه‌ی ڕیاکشنه‌ری دروست ده‌بێت، واتا له‌ ئه‌نجامی کاردانه‌وه‌ دروست ده‌بن، بۆیه‌ پێش ئه‌وه‌ی بییر له‌ فیکری سیاسیی و ئایدیۆلۆجیا بکه‌نه‌وه‌ بییر له‌ تۆڵه‌ سه‌ندنه‌وه‌ ده‌که‌نه‌وه‌ له‌و هێزه‌ی که‌ لێوه‌ی دروست بوونه‌. له‌ لایه‌کی دیکه‌شه‌وه‌ پارته‌ ده‌سه‌ڵاتداره‌کان هێنده‌ گه‌نده‌ڵیی و فه‌سادیی به‌ڕێوه‌بردنیان دروست کردووه‌ که‌ فیکر و ئایدیۆلۆجیای سیاسیی بە لای که‌سه‌وه‌ گرینگ نه‌بێت و ئه‌وه‌ی گرینگ بێت چۆنێتی بنبڕکردنی ئه‌و گه‌نده‌ڵیی و فه‌سادییە‌ بێت. بۆ نمونه‌، دروست بوونی بزوتنه‌وه‌ی گۆڕان کاردانه‌وه‌ بوو دژ به‌ یه‌کێتیی بۆیه‌ زیاتر بییریان له‌ گه‌نده‌ڵیی و فه‌سادیی ئیداریی ده‌کرده‌وه‌، ئه‌مەیش‌ وای کرد که‌ فیکر و ئایدیۆلۆجیای سیاسییان نه‌بێت. هه‌مان بۆچونیش سه‌باره‌ت به‌ هاوپه‌یمانیی بۆ دیموکراسی و دادپه‌روه‌ریش ڕاست ده‌بێت ئه‌گه‌ر بێت و ئه‌وانیش به‌ هه‌مان ڕێگه‌ی گۆڕاندا بڕۆن و بییر له‌ په‌یڕه‌و و پرۆگرامێکی پوخته‌ نه‌که‌نه‌وه‌ که‌ به‌ ڕونی فیکر و ئایدیۆلۆجیایان ڕون بکاته‌وه‌، به‌ تایبه‌تیش له‌به‌رئه‌وه‌ی که‌ چاوه‌ڕوان ده‌کرێت ده‌نگده‌رانی ئه‌م هێزه‌ زیاتر که‌سانی خوێنه‌وار و ئه‌کادیمیی بن بۆیه‌ زیاتر له‌ گرینگی فیکر و ئایدیۆلۆجیای سیاسیی تێده‌گه‌ن.

 

خوێندکارەکەی زانکۆی کامبریج، لایوایە دیین ئاماده‌ییه‌کی باڵای هه‌یه‌ له‌ کۆمه‌ڵگه‌ی کوردستاندا، "ئه‌گه‌ر بته‌وێت پارتیی ئۆپۆزیسیۆن دروست بکه‌یت، ته‌نانه‌ت ئه‌گه‌ر ئه‌و پارته‌ بییری عه‌لمانیانه‌ش به‌سه‌ریدا زاڵ بێت هێشتا ناتوانێت به‌ راشکاوانه‌ هه‌ڵوێستی هه‌بێت به‌رامبه‌ر به‌ دیین، یان ئه‌گه‌ر هه‌ڵوێستیشی هه‌بێت هه‌ڵوێستێکی شه‌رمنانه‌ ده‌بێت، چونکه‌ کاردانه‌وه‌ی نه‌رێنی به‌رامبه‌ر به‌ دیین به‌ مانای مه‌رگی سیاسیی دێت له‌ کۆمه‌ڵگه‌ی کوردستاندا. هه‌ر ئه‌مه‌ش وایکردووه‌ که‌ تاڕاده‌یه‌ک رووننییه‌ که‌ ئایه‌ بزوتنه‌وه‌ی گۆڕان چۆن ده‌یه‌وێت هه‌ڵس و که‌وت له‌گه‌ڵ دییندا بکات، چونکه‌ هیچ فیکر و ئایدیۆلۆجیایه‌کی وونی نییه‌، ته‌نها ئه‌وه‌ نه‌بێت که‌ ده‌ڵێن دژی گه‌نده‌ڵیین و دادپه‌روه‌رییمان ده‌وێت ئه‌مه‌ش به‌سه‌ بۆ ئه‌وه‌ی ده‌نگی پێبێنن، بۆیه‌ بینیمان له‌ یه‌که‌م به‌شداریاندا له‌ هه‌ڵبژاردنی پارلمانی کوردستاندا توانیان ۲۵ کورسی مسۆگه‌ر بکه‌ن. بۆیه‌ هه‌تا گه‌نده‌ڵیی و نادادپه‌روه‌ریی بنبڕ نه‌کرێت ئه‌سته‌مه‌ فیکر و ئایدیۆلۆجیا گرینگی هه‌بێت به‌ لای ده‌نگده‌ره‌وه‌، هه‌ر ئه‌مه‌ش وایکردووه‌ که‌ پارته‌ ئۆپۆزیسیۆنه‌کان که‌متر بایه‌خ به‌ فیکری سیاسیی بده‌ن.

rebin Aabdwrehman

رێبین عبدالرحمن فتاح، توێژەری سیاسیی-زانكۆی چەرموو، بۆ گۆڤاری ئازادیی کۆڵگە لەوەدەدوێت کە "چەمكی ئۆپۆزسیۆن لە فیکری سیاسییدا واتایەكی قووڵی هەیە، چونكە خۆی دەبینێتەوە لە هەبوونی بەدیل و جێگراوەیەک بۆ ئەو هێزەی كە دەسەڵاتی سیاسیی بەڕێوەدەبات، واتا هێزی بەدیل هەمیشە كار لەسەر كەموكوڕییەكانی هێزی بەرامبەری دەكات كە رەنگە هێزی بە پێوانەی هێزی ئەویش نەبێ‌، بەڵام ئەمە گرینگ نییە، ئەوەی كە گرینگە ئەوەیە هێزی ئۆپۆزیسیۆن چۆن دەتوانێت لەسەر هەڵەی پارتیی دەسەڵاتدار خۆی دروست و ئامادە بكات بۆ دەسەڵاتی سیاسیی."

ئەو توێژەرە سیاسییە، ئاماژە بۆ ئەوەدەکات هەر لەسەرەتای دروستبوونی دەوڵەتی عێراقەوە كورد لەڕووی فیکری و سیاسییەوە رووحیەتی ئۆپۆزیسیۆن بوونی تیادا هەبووە، چونكە حكومەتە یەك بە دوای یەكەكانی عێراق دژایەتی كوردستانیان كردووە و ئەمەیش واتای ئۆپۆزیسیۆن بووە، بەتایبەت دژی دەسەڵاتی حكومەتی بەعس تا ساڵی ١٩٩١، بۆیە لەدوای دروستبوونی بۆشایی ئیداری لە هەرێمی كوردستان، و كاتێك كە بەرەی كوردستانی بووە دەسەڵاتی ئەمری واقیع (De facto).

 

وتیشی: لە 19/ 5/ 1992 هەڵبژاردن كراو كە تیادا هەشت لیست بەشداری ئەو هەڵبژاردنەیان كرد لەدروست بوونی حكومەت و دابەشكردنی پەنجا بە پەنجا لەنێوان دوو هێزی باڵا دەستی وەک یەکێتیی نیشتمانیی كوردستان و پارتیی دێمۆكراتیی كوردستان. لەم كاتەدا ئۆپۆزیسیۆنی سیاسیی كارا و كاریگەر لەناو حكومەت و دەرەوەی حكومەتیش بوونێكی ئەوتۆی نەبووە، تەنها بزووتنەی ئیسلامی كوردستان نەبێ‌ ئەویش لەناو حكومەت نەبوو بەڵكو لەدەرەوەی حكومەت بووە، ئەویش كاریگەرییەكی واهای نەبووە، لەبەرئەوەی ئەم هێزە ئۆپۆزیسیۆنی چەكدار بوونە ، و دەكرێت بووترێت ئۆپۆزیسیۆن عقائدی بوونە، وەكو چۆن نەوشیروان مستەفا دەڵێت:"بزوتنەوەی ئیسلامیی لەو دەمەدا ئۆپۆزیسیۆنێكی سیاسیی نەبوون، لەبەرئەوەی كە توندڕەو بوون و خواستی بەشدارییكردنیان لە حكومەتی غیرە ئیسلامیی دا نەبووە، ئەوان لەسەر پێكهێنانی سیستمی سیاسیی بەشێوەی علمانی رازی نەبوون، چونكە دید و بۆچوونی سیاسیی یان ئاراستەی سیاسییان نەبووە، لەبەرئەوەی بڕوایان بە چەك بووە ئەویش بە دعم و پاڵپشتی ئیران." لەدوای ساڵی 1996 و ڕووداوی 31 ی ئاب كە پارتیی دەستی بەسەر هەولێردا گرت لەدوای ئەو ڕووداوە بەدواوە شێوەیەك لە دوو ئیدارەی لە هەولێر و سلێمانی هاتە كایەوە. لەو دەمەدا و هەتا ساڵی 2001 هیچ جۆرە ئۆپۆزیسیۆنێكی سیاسیی كارا بوونی نەبووە كە ببێتە بەدیلی هێزی بەرامبەر، تەنها ئۆپۆزیسیۆن چەكدار بوونی هەبووە ئەویش زیاتر لەڕووی فیکریی و عقادیەوە بووە كە دژایەتی تەواوی سیستمی سیاسییان دەكرد.

ئەو توێژەرەی زانکۆی چەرموو، لە رووی فیکری سیاسییەوە ئەو شرۆڤەدەکات کە لەدوای ساڵی 2000-ەوە لەهەرێمی كوردستاندا سەیان هەڵداوە"لەرووی سیاسییەوە نا كە بەدیلی هێزە دەسەڵاتخوازەكان بوونی هەبێ‌، بەڵكو ئۆپۆزیسیۆنی شعبیی و مەدەنیی بوونی هەبووە وەكو "نێوەندی رەهەند" كە چەند نووسەرێك دید و بۆچوونی خۆیان بەشێوەیەكی ئاشكرا و ڕوون بەرامبەر دەسەڵاتی سیاسیی دەربڕیوە، هەروەها ڕاگەیاندنی ئازاد، بەتایبەتی دروست بوونی ڕۆژنامەی هاووڵاتی لەدوای ساڵی 2000، هەروەها دواتر گۆڤاری لڤین و رادیۆی نەوا و كوردستان پۆست و كوردستان نێت، كە ئەمانە هەموویان غیرە حیزبی بوون و هەوڵیانداوە دیوی دووەمی پارتە دەسەڵاتدارەكانی هەرێمی كوردستان پیشان بدەن. و هەروەها دروستبوونی (بزوتنەوەی هەتا كەی ) لە بەرواری 5/ 5/ 2007 كە بزوتنەوەیەكی مەدەنیی بووە كە هەموو ئەمانە لەدەرەوەی دەسەڵات بووەنە،بەڵام لەدوای ساڵی 2009 بەدوای بەتایبەت لەدوای 25/ 7/ 2009 ، هێزێكی سیاسیی كە خاوەن دیدگا و ڕوئیای سیاسیی دیاریكراو بێت دروست بوو كە توانی 25 كورسی پارلمانی بەدەست بهێنێت واتا لە 23% دەنگەكانی هەرێمی كوردستان، ئەم هێزەش بزوتنەوەی گۆڕان بووە، كە دواتر بووە پارتێكی معارزەی دەسەڵاتی سیاسیی كە سەنگ و قورسایی پارلمانیی هەبێت ببێتە جێگراوەی هێزە دەسەڵاتدارەكان لە كوردستاندا."

 

رێبین عەبدولرەحمان وتیشی: لەبەرئەوەی پارتە كوردییەكان خەباتیان لەشاخ بووە خەباتێكی مەدەنیی نەبووە، بۆیە تجروبە و ممارەسەی دەسەڵاتیان نەبووە، ئەمەش هۆكارێکە بۆ ئەوەی كە یەکێتیی و پارتیی هیچ كەمیان نەیان توانیوە ببنە معارەزە و ئەوی تریان بچێتە دەسەڵات، چونكە هەردەم هەدووكیان هەوڵی زیادكردن و زیادبوونی بەرژەوەندنی خۆیانیان داوە و دژایەتی تەواوی ئەو هێز و لایانانەش بوون كە خواستی بە ئۆپۆزیسیۆن بوونیان تیادا بووە. هەروەها لە دوای ساڵی 2009 بەدوای كە بزوتنەوەی گۆڕان بووە ئۆپۆزیسیۆن لەناو پارلمانی كوردستان، لێرەوە ئۆپۆزیسیۆنێكی كارا و كاریگەر دروست بوو، بەڵام یەکێتیی و پارتیی بە هەموو شێوەیەك دژایەتیان دەكرد، لەگەڵ ئەوەی ئۆپۆزیسیۆن بوونی بزوتنەوەی گۆڕانیش ئەوەندە بڕی نەكرد تەنها چوار ساڵ بوو دواتر ئەویش چووە ڕیزی دەسەڵاتەوە.

 

جەخت لەوەدەکاتەوە، بەشێوەیەكی گشتیی لە هەرێمی كوردستان ئۆپۆزیسیۆن، بەو واتاییەی لە فیکری سیاسییدا بوونی هەیە رەنگە بەشێوەیەكی ڕێژەیی تا ساڵی 2009 بوونی نەبووبێت، "بەڵکو لەدوای ساڵی 2009-وە ئۆپۆزیسیۆنێكی سیاسیی وەكو بزوتنەوەی گۆڕان هاتە كایەوە، بەڵام ئەمیش زۆر بەردەوام نەبوو و چووە دەسەڵات. بۆ داهاتوویش لە هەڵبژاردنی داهاتووی پارلمانی كوردستاندا كە ڕەنگە هێزی نوێ‌ و بۆچوونی نوێ‌ و دیدی نوێ‌ بێتەكایەوە، خۆی وەكو بەدیلی دەسەڵات پیشان بدات، بەڵام ئەوەی كە گرینگە ئەوەیە ئەو هێزەی كە لەداهاتوودا دەیەوێت ببێتە هێزی جێگرەوە یان بەدیل چۆن دەبێت و چۆن كار دەكات. هێزی نوێ باشتر وایە هەڵگری ئەو خواست و هیوایە بێت كە گەنجان و ژنان هەیانە بۆ ژیانی دوا ڕۆژی خۆیان، بۆیە داهاتوو خواست و ویستی هێزە كۆن و نوێیەكان بۆ دەسەڵات و بەرژەوەندیی دەردەخات، كە ئایا دەیانەوێت بۆ چ مەبەستێك كار بكەن؟"

brwa star

بڕوا ستار، خوێندکاری زانستە سیاسییەکانی-زانکۆی سلێمانیی، بۆ ئازادیی کۆمەڵگە هێما بۆ ئەوەدەکات"لە بنەڕەتدا ئۆپۆزیسیۆن بزاڤێکە بۆ بەرھەڵستیی دەستەڵاتداریەتیی و نیشاندانی ھەڵە و کەموکوڕیی دەستەڵات و دانانی میکانیزمی چارەسەرییە بۆ ئەو ھەڵە و کەموکوڕییانەی کە دەستەڵات دەیھێنێتە کایەوە، ئەمەیش لە سیستمێکەوە بۆ سیستمێکی تر و لە وڵاتێکەوە بۆ وڵاتێکی تر دەگۆڕێت. جەوھەری ئۆپۆزیسیۆن بوون لە خودی ئەو تێڕوانینە فیکریانە دایە کە ھەوڵی گۆڕین و باشترکردنی سیستم دەدەن ئەویش لە ڕێگەی ململانێی سیاسیی و ئابووریی دەکرێت."

 

ئەو خوێندکارەی زانکۆی سلێمانیی، ئاماژە بۆ ئەوەدەکات لە ھەرێمی کوردستان ئەزموونی ئۆپۆزیسیۆنی سیاسیی سەرەتا دەگەڕێتەوە بۆ درووستبوونی بزوتنەوەی گۆڕان، وتیشی"لە بنەمادا وەک حیزبێکی ئۆپۆزیسیۆن خۆی دەرخست، ئەمەش بەردەوام بوو تا قۆناغی ھەڵبژاردن و دوای ھەڵبژاردنیش بەم ڕەنگە مایەوە، لێرەدا ئەم قۆناغە سەرەتاییە بۆ ئۆپۆزیسیۆن بوون، شێوازێکی نا ڕێکخراوی پێەوە دیارە و وای نیشاندەدات کە تاکە ناڕازییەکان بۆ خۆی رادەکێشێت و بەبێ بوونی پەروەردە و رێکخستن دەریان دەخاتە پێشەوە. بێگومان ئەمەیش ئەزموونێکە لە رووی تیۆرییەوە بەم چەشنە باش نەبوو کە مرۆ بتوانێت بیکاتە ھێزی پشتیوان، بەڵام سەرەڕای ھەموو کوم و کوڕییەکان بزاوتێکی ئۆپۆزیسۆن باش بوو بۆ قۆناغەکە."

 

بڕوا، جەخت لەوەدەکاتەوە: لە ئێستادا ھەرێمی باشووری کوردستان بەبێ ئۆپۆزیسیۆن گوزەری حکومڕانیی دەکات، ئەو حیزبانەی کە لە ڕابردوو ئۆپۆزسیۆن بوون لە ئێستادا لە دەستەڵاتدا بەشدارن و ئەزموونی ئۆپۆزیسیۆنیش تێیدا کۆتایی ھاتووە! لە بری ئەوە ئێستا کۆمەڵگە بە ڕۆحیەتێکی ئۆپۆزیسیۆن جێگەی گرتەوەوە، تێکۆشانی ژینی شایستە و سیاسەتێکی ئەخلاقیی دەکات، دەتوانیین بە پێودانگی سیاسیی، ئێستا ئەم قۆناغە ناوبنێین قۆناغی نەبوونی دەستەڵات و ئۆپۆزیسیۆن، بە بەڵگەی ئەوەی ئێستا نە دەستەڵاتێکی شەرعیی ھەیە و نە ئۆپۆزیسیۆنێکی رێکخراو و خاوەن پرەنسیپ، بۆیە باشترین ھەل بۆ ئەوەی باشوور باتوانێت ھەستانەوە لە ژیانی تێکۆشانی سیاسیی خۆیدا بکات، پەنابباتە بەر رێکخستن و خۆ پەروەردەکردن، کە دوو میکانیزمی زانستیی و فیکریین بۆ دەربازبوون لە بێ چارەیی و بێ ھیوایی .

 

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: