گۆشه‌ی ئازاد

ئیمڕالی گوانتانامۆی رۆژهه‌ڵاتی ناوینه‌

سه‌ردار ستار

 

له‌مێژووی گه‌لی كوردستان بۆته‌ نه‌ریتێك كاتێك شۆڕش و سه‌رهه‌ڵدانه‌كان گه‌یشتوونه‌ته‌ ئاستی سه‌ركه‌وتن، له‌لایه‌ن زلهێزه‌كان رووبه‌ڕووی له‌ناوبردن و توانەوه‌ ده‌بنه‌وه‌، له‌ سه‌ره‌تای سه‌ده‌ی بیست له‌لایه‌ن زلهێزەکانی جیهان چه‌ندین جار ئه‌مه‌ دووباره‌ بۆته‌وه‌، نمونه‌كانی شێخ محمود و شێخ سه‌عید، دواتریش سه‌ید ره‌زا و سمكۆی شكاك، له‌دوای شه‌ڕی جیهانی دووه‌م به‌هه‌مانشێوه‌ له‌به‌رامبه‌ر كۆماری كوردستان له‌مهاباد، دواتریش له‌به‌رامبه‌ر جوڵانه‌وه‌ی بارزانیه‌كان، سه‌ره‌ڕای گۆڕانكاری لە هەلومەرجی جیهان، به‌ڵام سه‌باره‌ت به‌كورد هیچ شتێك نه‌گۆڕدراوه‌، ئه‌وه‌شمان له‌ جوڵانه‌وه‌ی ئه‌یلولی ساڵی 1975 باشتربینی، بێگومان بە کۆتایی هێنان و پاکتاوی جەستەیی رێبه‌ر و سه‌ركرده‌كانیش، بزووتنەوەکەیان تراژیدییانە  كۆتایی هێنراوه‌.

پەیوەندی و سیاسه‌تی زلهێزه‌کانی جیهان له‌به‌رامبه‌ر هێزه‌ سیاسیه‌ كوردیه‌كان و گه‌لانی بنده‌ست به‌گشتی له‌سه‌ربنه‌مای به‌كارهێنان و خستنه‌ خزمه‌تی خۆیان بووە، نمونه‌ی سۆڤیه‌ت و كۆماری كوردستان هێشتاش جێیەکی بیرنەکراوی لە یادوەری نەوەکانی دواتردا هەیە و هێشتاش زیندووە. به‌هه‌مانشێوه‌ هەلوێستی ئەمەریکا و وڵاتانی ناوچە لە رێکەوتننامەی جه‌زائیردا. رۆژنامەوانێک لە شای ئێران دەپرسێ چەندت پێویستت بۆ ئەوەی بیر لە دەستبەردان لە کوردەکان بکەیتەوە وتی " چەند خولەکێک" ئەمە نەبوونی کورد نە لە تاکتیک و نە لە ستراتیژی هێزەکانی ناوچەکە و جیهان دا نیشان دەدات ئەگەر کورد خۆیان خاوەن ستراتیژی نەبن. ‌به‌واتایه‌كی تر هه‌ڵوێستی زلهێزه‌كان له‌به‌رامبه‌ر گه‌لی كورد چ كاتێك به‌رژه‌وه‌ندیان ویستویه‌تی پشتگیرین كردوه‌و كاتێك هاوسه‌نگیش گۆڕاوه‌، بێگومان پشتیان كردۆته‌ بزووتنه‌وه‌و شۆڕشه‌كانی كوردستان.

دواین پیلانگێڕی و گه‌له‌ كۆمه‌ له‌به‌رامبه‌ر شۆڕشی كوردستان بێگومان له‌به‌رامبه‌ر رێبه‌ری شۆڕشی كوردستان به‌ڕێز ع.ئۆجالان بووه‌ له‌ 15ی شوباتی 1999. له‌گه‌ڵ ئه‌وه‌ی پیلان و هه‌وڵی تریش پێش ئه‌و به‌رواره‌ له‌به‌رامبه‌ر بزووتنه‌وه‌ی په‌كه‌كه‌ هه‌بووبێت‌، به‌ڵام له‌ 15ی شوبات به‌ دیل گرتنی به‌ڕێز ئۆجالان ئەنجامگیر بوو. زلهێزه‌کانی جیهان و ده‌وڵه‌ته‌ داگیركه‌ره‌كانیش چاوه‌ڕێ بوون كه‌ دوای دیلگرتنی رێبه‌ری شۆڕش، ئیدی شۆڕش كۆتایی دێت، بۆ ئه‌مه‌ش رۆژ و مانگیان ئه‌ژمارد.

قه‌باره‌ی ئه‌و پیلانگێڕه‌ له‌ئاستێك دابوو، به‌گوێره‌ی به‌ڵگه‌كان زیاتر له‌ 32  ده‌وڵه‌ت له‌و پیلانه‌ به‌شداریان كردوه‌‌، هه‌مانكات ته‌واوی ده‌زگا سیخوڕی و هه‌واڵگیریه‌كانی زلهێزه‌كان، له‌گه‌ڵ ده‌زگای سیخوڕی ناتۆ بە نهێنی به‌ناوی "گلادیۆ". ده‌ست له‌پشت دانی ئه‌و‌ زلهێزانه‌ وایان كردبوو كه‌ توركیا هارببێ و له‌ 9/10/ 1998 بڕیار بدا و هێرش بكاته‌ سه‌ر سنوره‌كانی ده‌وڵه‌تی سوریاو هه‌ڕه‌شه‌ی شه‌ڕ له‌شام بكات. راسته‌ ده‌وڵه‌تی تورك پێش ئه‌و رێكه‌وته‌ چه‌ندین  هه‌وڵی تری دابوو، به‌ڵام هه‌موو هه‌وڵه‌كانی مایه‌ پووچ ده‌ركه‌وتبوون له‌به‌رامبه‌ر سه‌ركردایه‌تی شۆڕش.

پێناسەی 15ی شوباتی 1999 له‌لایه‌ن گه‌لی كورده‌وه‌ به‌ رۆژی ره‌ش ئاستی تاریکی ئەو رۆژە بۆ کورد نیشان دەدات، ئازادیخوازان و شۆڕشگێڕانی كوردستان به‌ دیلكه‌وتنی رێبه‌ر ئاپۆ وەک زەبرێکی قوڵتر لە بزووتنەوەکانی پێشوویان دەبینی، هەموو هیواکانی خۆیان لەو شۆڕشەدا بینی و بۆ چەند رۆژێکیش بێت هەستی شکستێکی تر لە لایەک و توڕەییەکی کۆنتڕۆڵ نەکراو لە لایەکی تر سەرتاپای کوردستان و دەرەوەی وڵاتی داگرت. هەرکەس لەگەڵ خۆی ئەم پرسیارەی دەکرد، رووبەڕووی هەمان چاره‌نووسی رابردووی دەبینەوە؟

وه‌ك چۆن له‌سه‌ره‌تا ساڵانی حه‌فتاوه‌ بزووتنه‌وه‌ شۆڕشگێڕه‌ تازه‌كه‌، به‌جیاواز و نوێبوونه‌وه‌ هاتبووه‌ مه‌یدان، هه‌مانكات ره‌وتێكی تازه‌ش بوو له‌ خه‌باتی نه‌ته‌وه‌یی و دیموكراتیدا، ئه‌مه‌ش وای كردبوو كه‌ هیوایه‌كی زیاتر بداته‌ كۆمه‌ڵگه‌ی كوردستان، بێگومان ته‌واوی ئه‌و مرۆڤانەی له‌و تێكۆشانه‌ شوێنیان گرت جیاوازبوون، واتا شۆڕشێكی نوێ به‌ نه‌وه‌یه‌كی نوێ و به‌كادیری نوێ. خاڵی هه‌ره‌ سه‌ره‌كیش ئه‌ویش پشت به‌خۆ به‌ستن، له‌سه‌ر پێی خۆ وه‌ستان، به‌خۆ پاراستن. ئه‌مه‌ بنه‌مای سه‌ره‌كی ئه‌و بزووتنه‌وه‌ نوێگه‌ر و سه‌ربه‌خۆ و ئازادیخوازه‌بوو كه‌ زلهێزه‌كان نه‌یانده‌توانی ده‌سته‌مۆی بكه‌ن، هه‌مانكات بیخه‌نه‌ خزمه‌ت به‌رژه‌وه‌ندیه‌كانیان، راسته‌ ئه‌مه‌ باری شۆڕشی گرانتر كردبوو، به‌ڵام وای كردبوو كه‌ ره‌گ و ریشه‌كه‌ی داکوتێت، ئیدی له‌كوردستان دار به‌ڕویەک ئه‌ڕوێنرا، هه‌ر رۆژ ره‌گه‌كانی زیاتر ڕۆدەچووە ناخی وڵات.

  • ئیمڕالی شوێنێكی نامۆ به‌ گه‌لی كورد:

ده‌وڵه‌تی تورك دوای یه‌كلابوونه‌وه‌ی شه‌ڕی له‌گه‌ڵ یۆنانه‌كان له‌ سه‌ره‌تای ساڵانی بیستی سه‌ده‌ی رابردوو، دوورگه‌ی ئیمڕالی له‌ ده‌ریای مه‌ڕمه‌ڕه‌ كه‌وته‌ سه‌ر كۆماری توركیا، له‌دوای ساڵانی په‌نجا وه‌ك زیندان به‌كارهات، سه‌ره‌تا بۆ عەدنان مه‌نده‌رێسی سه‌رۆك وه‌زیرانی ئه‌وكات و دواتریش بۆ هونه‌رمه‌ندی ناوداری كورد یه‌لماز گونه‌ی، ئه‌وه‌ سه‌لمێنراوه‌ كه‌ ئه‌وه‌ی بچێته‌ ئیمڕالی ناگه‌ڕێته‌وه‌، واتا ئیمڕالی زیندانی مه‌رگی هێواش و له‌سه‌رخۆیه‌ بۆ ئه‌و كه‌سه‌ی له‌وێ به‌ند ده‌كرێت. كاتێك رێبه‌ر ئاپۆ ده‌سگیركرا یه‌كسه‌ر هێنایان و بردیانه‌ ئیمڕالی، به‌وپێیه‌ ده‌بێ بزانین كه‌ ئیمڕالی پێشوه‌خته‌ ئاماده‌كرابوو. بێگومان مانه‌وه‌ له‌ دوورگه‌یه‌كی ناو ده‌ریا بۆ ئه‌و مرۆڤه‌ی هه‌موو ژیانی له‌ وشكانی به‌سه‌ر بردبێ سه‌خته‌، چ جای بۆ رێبه‌ری شۆڕش. هه‌موومان ئه‌وه‌ ئه‌زانین كاتێك ماندیلا به‌ند كرا له‌ باشوری ئه‌فریقا له‌ هه‌ڕه‌تی لاویه‌تی دابوو، بۆیه‌ كاتێك له‌ زیندان ده‌ركه‌وت تازه‌ كامڵ ده‌بوو، به‌ڵام پێچه‌وانه‌ رێبه‌ر ئاپۆ له‌ ته‌مه‌نی كامڵی دیل گیرا، بۆیه‌ بارودۆخی زیندان بۆ ئه‌و سه‌ختتره‌.

ئیمڕالی بۆ مردن و پووچ كردن و بێ كاریگه‌ركرن و له‌ناوبردن بونیادنراوه‌، هه‌روه‌ها تاكو بتوانرێت گۆشه‌گیری به‌رده‌وام و دووركه‌وتنه‌وه‌ له‌ كۆمه‌ڵگه‌. ئه‌وه‌ش ده‌زانین تاكو بتوانن له‌ رێگه‌ی شه‌ڕی ده‌روونیەوە بتوانن كاربكه‌نه‌ سه‌ر بڕیار و شێوازی بیركردنه‌وه‌و بێ توانا كردن. له‌وانه‌یه‌ نه‌توانین هه‌موو ئه‌و به‌رخودانی و هێز و توانایه‌یی له‌ 18 ساڵی مانه‌وه‌ی رێبه‌ر ئاپۆ له‌ زیندانی ئیمڕالی نیشانبده‌ین، یان بە زەحمەت گوزارەی لێبکەین، به‌ڵام پێویسته‌ چه‌ند ئاماژه‌یه‌ك به‌و هێز و ئیراده‌ شۆڕشگێریه‌ بكه‌ین، ئه‌گه‌رنا له‌ رۆحی شۆڕش له‌ماوه‌ی ئه‌و 18 ساڵه‌ تێناگه‌ین.

  1. رێگا كردنه‌وه‌ له‌به‌رده‌م ده‌ستپێشخه‌ریه‌كی سیاسی و دیموكراتی، ئه‌ویش به‌ گۆڕانكاری له‌ ستراتیژیه‌تی شۆڕش، له‌ ستراتیژیه‌تی شه‌ڕ بۆ ستراتیژیه‌تی ئاشتی، له‌ دابڕان بۆ پێكه‌وه‌ ژیان، له‌ دوژمنایه‌تی بۆ برایه‌تی، له‌هێرش بۆ خۆپاراستن.
  2. پێداچوونه‌وه‌ به‌ هزر، فه‌لسه‌فه‌، ئایدیۆلۆژیا، سه‌ر له‌نوێ داڕشتنه‌وه‌، دیاری كردنی هێڵی تێكۆشان، ده‌ستنیشان كردنه‌وه‌ی دینامیزمه‌كانی شۆڕش ئه‌وانیش ژنان و گه‌نجان.
  3. ده‌رگا كردنه‌وه‌ له‌به‌رده‌م سیاسه‌تی دیموکراتی، دانوستاندن، کردنی زیندان بە ناوه‌ندێك بۆ گوڕدان بە شۆڕش.

‌كاتێك ساڵی 1999 دێنینه‌وه‌ بیرمان، ئه‌و ده‌سكه‌وت و تێكۆشانه‌ی له‌ ئیمڕالی ئه‌نجامدراون له‌ خه‌یاڵ ده‌چن، چونكه‌ له‌ژێر ده‌سته‌ی و له‌ كونجی زیندانی تاكه‌كه‌سی و له‌ناو ده‌ریا، کارێكه‌ له‌مه‌حاڵ ئه‌چێ، بۆ مرۆڤێكی ئاسایی بێگومان مه‌حاڵه‌، ئه‌وه‌ی رێبه‌ر ئاپۆ نیشانیدا له‌ 18 ساڵی زیندان ئیراده‌ی له‌ راده‌ به‌ده‌ری مرۆڤێكه‌ نه‌ك ته‌نها توانی به‌رخودان بكا و بەچۆک دا نەیەت به‌رامبه‌ر دوژمن، هه‌مانكات داگیركه‌رێكی وه‌ك ده‌وڵه‌تی توركیشی هێنا سه‌ر مێزی گفتو گۆ. مه‌حاڵی كرده‌ واقع.

  • پرۆسه‌ی ئاشتی و رۆڵی ئیمڕالی:

ئه‌گه‌ر شه‌ڕی چه‌كداری لە باکوری کوردستان له‌به‌رامبه‌ر ده‌وڵه‌تی داگیركه‌ری تورك وه‌ك كارێكی شێتانه‌ به‌ناو ده‌كرا، به‌هه‌مانشێوه‌، هیچ كه‌سێكیش باوه‌ڕی نه‌ده‌كرد پرۆسه‌ی ئاشتی و چاره‌سه‌ری دیموكراتیانه‌ بگاته‌ ئه‌و ئاسته‌ی كه‌ شاندی دانوستاندنی شۆڕش و داگیركه‌ر له‌ ئیمڕالی لەسەر مێزێک کۆببنەوە و باسی چاره‌سه‌ری پرسی كورد و به‌ره‌وپێش بردنی دیموكراتی بكه‌ن له‌ توركیا. ئه‌گه‌ر پرۆسه‌ی ئاشتی له‌ توركیا له‌ نه‌ورۆزی 1993 به‌ئاگربه‌ستی یه‌كلایه‌نه‌ له‌ لوبنان ده‌ستی پێكرد له‌سه‌رده‌می توركوت ئۆزال، ئه‌وا له‌ نه‌ورۆزی 2013 له‌ ئامه‌د له‌ناو دوو ملیۆن كوردستانیدا گه‌یشته‌ ترۆپک، له‌بنه‌ڕتدا شۆڕشی ئاشتی سه‌ركه‌وت. ئه‌وه‌ی پرسیاری ئه‌وه‌ بكات ئاگربه‌ست و دانوستاندن و قۆناخی ئاشتی چی له‌گه‌ڵ خۆی هێنا، ئه‌وا وه‌ك دوایین نمونه‌ بۆ به‌ڵگه‌یه‌كی به‌رچاو ده‌بێ بزانێ چۆن هه‌ده‌په‌ 80 كورسی په‌رله‌مانی هێنا، ده‌بێ له‌ به‌رخودانی و هێزی تێكۆشانی ئیمڕالی تێبگات.

  • بێچاره‌ی ئه‌ردۆغان و هه‌وڵه‌كانی بۆ جاڕدانی شه‌ڕ و دیكتاتۆریه‌ت بوون:

درێژترین ماوه‌ی ئاگربه‌ست و دانوستان و دایالۆگ و گفتوگۆ له‌گه‌ڵ ده‌سه‌ڵاته‌كه‌ی ئه‌ردۆغان بووه‌، له‌ 2002 تاكو 2015، ئه‌گه‌ر له‌و نێوانه‌ جار جارێك هه‌ندێك شه‌ڕ و تێكهه‌ڵچوونیش روویدابێ، به‌ڵام ئه‌نجام به‌ ئاگربه‌ست كۆتایی هاتووه‌. له‌هه‌ر یه‌ك له‌و ئاگربه‌ست و دانوسانانە شۆڕش ده‌سكه‌وتی گرنگی ده‌ست كه‌وتوه‌، زیاتر لە 100 شاره‌وانی، سه‌ركه‌وتن و چوونه‌وه‌ بۆ په‌رله‌مان له‌ 2007و سەرەتا به‌ده‌ستهێنانی 22 په‌رله‌مانتار پاشان 36 و دواتریش ٨٠ کورسی پەرلەمان و بوونە هێزی سێیەم لەپەرلەمان دا، سازدانی دوو پارتی یه‌كیان بۆ ته‌واوی توركیا، یه‌كیان ته‌نها بۆ باكوری كوردستان و پێگەیاندنی كادیر، به‌ره‌وپێش بردنی پرۆسه‌ی خۆبه‌ڕێوه‌بردنی دیموكراتی و دامەزراندنی كۆنگره‌ی جڤاكی دیموكراتی وه‌ك په‌رله‌مانی باكوری كوردستان و سه‌دان داموده‌زگای مه‌ده‌نی و خزمه‌تگوزار و نیشتمانی، سازدانی به‌هه‌زاران كۆڕ و كۆنفرانس و ناوه‌ندی وێژه‌یی و هونه‌ری و ئه‌كادیمی.

ئه‌ردۆغان و فاشیزمی توركی ره‌ش نه‌یانتوانی به‌رگه‌ی ئه‌و هه‌موو سه‌ركه‌وتن و ده‌سكه‌وتانه‌ی شۆرش بگرن به‌ڕێگای ئاشتی، بۆ ئه‌مه‌ش سه‌ره‌تا له‌ رێگای بەهێزکردن و فینانسکردنی داعش و هێزه‌ شۆڤینزمه‌كان به‌ناوی جیاجیاوە و له‌ژێر په‌رده‌ی ئاینی ئیسلام و مه‌زهه‌بی سوونه‌ هێرشی کردە سەر دەستکەوتەکانی گەل. ئه‌نجامی سه‌ركه‌وتنه‌كانی به‌ره‌ی شۆڕش ده‌ریخست كه‌ رژێمه‌كه‌ی ئه‌ردۆغان و هێزه‌ چه‌ته‌كانی داعش شكست دێنن، بۆ ئه‌مه‌ش ئه‌ردۆغان یه‌كه‌مین كاردانه‌وه‌ی له‌به‌رامبه‌ر دانوسان و پرۆسه‌ی ئاشتی بوو له‌ئیمڕالی، ئه‌مه‌ش به‌كاردانه‌وه‌ی په‌سندنه‌كردنی گه‌ڵاڵه‌نامه‌ی دۆڵمه‌ باخچه‌ بوو، تێكدان و بڵاوه‌پێكردنی شاندی دانوسانی ده‌وڵه‌ت، فه‌رمانی هەڵایسانەوەی شەڕ. هه‌رچه‌نده‌ به‌ره‌ی شۆڕش چاوپۆشی كرد له‌ كۆمه‌ڵكوژی كاتی هه‌ڵبژاردنه‌كانی ئامه‌د، دواتر پیرسوس و هه‌موو ئه‌وانه‌ی تری به‌دوای دا هاتن، به‌ڵام به‌ره‌ی دوژمن گوڕی بە شەڕدا. سەرئەنجام 24ی ته‌موزی 2015 خولێكی نوێی شه‌ڕ به‌ده‌ستپێشخه‌ری ئه‌ردۆغان ده‌ستی پێكرده‌وه‌.

له‌مانگی نیسانی 2015وه‌ تا رۆژی 11ی ئه‌یلولی 2016 هیچ دیدارو چاوپێكه‌وتنێك له‌گه‌ڵ به‌ڕێز ئۆجالان نه‌كراوه‌، له‌گه‌ڵ ئه‌وه‌ش ئه‌و پێنج كه‌سه‌ی گوازرابوونه‌وه‌ بۆ ئیمڕالی دوو كه‌سیان دوور خرانه‌وه‌، ئه‌و گۆڤار و په‌رتوك و پێداویستیه‌ رۆژانه‌یانه‌ش هه‌موویان راگیران یان زۆر كه‌مكرایه‌وه‌. ئه‌ردۆغان به‌ فه‌رمی گوتی" پرۆسه‌یه‌ك به‌ناوی ئاشتی نیه‌، دانوسان و گفتوگۆ نیه‌، هیچ گه‌ڵاڵه‌نامه‌یه‌ك نیه"‌. ئه‌ردۆغان به‌نیاز بوو له‌پرۆسه‌ی ئاشتدا رێبه‌ر ئاپۆ ته‌سلیم بگرێ و بگاته‌ ئاستێك بڵێ با گه‌ریلا چه‌ك دابنێ، كاتێك ئه‌نجامی نه‌گرت ئه‌وكات ده‌بێ بزانرێت یه‌كه‌مین هێرش بۆ سه‌ر به‌ره‌ی شۆڕش له‌لایه‌ن ئه‌ردۆغانه‌وه‌ كرایه‌ سه‌ر رێبه‌ر ئاپۆ، واتا ئه‌ردۆغان ده‌یویست ئه‌وه‌ی له‌ پرۆسه‌ی ئاشتی دۆڕاندویه‌تی له‌شه‌ڕدا به‌ده‌ستی بخاته‌وه‌. بۆیه‌ ئه‌وانه‌ی شۆڕش به‌ ده‌ستپێكردنه‌وه‌ی شه‌ڕ به‌ناو ده‌كه‌ن له‌بنه‌ڕتدا دوژمنایه‌تیه‌كی سه‌رسه‌ختی رێبه‌ر ئاپۆ ده‌كه‌ن، هه‌مانكات دوژمنایه‌تی ئه‌ردۆغانیش له‌به‌رامبه‌ر گه‌لی كوردستان په‌رده‌پۆش ده‌كه‌ن.

له‌ئێستا كه‌ به‌ره‌و 18مین ساڵی دیلێتی رێبه‌ر ئاپۆ ده‌چین، بێگومان ئیمڕالی گوانتانامۆی رۆژهه‌ڵاتی ناوینه‌، ئه‌گه‌ر گوانتانامۆ بۆ ئیسلامه‌ توندڕه‌وه‌كانی دوای ساڵی 2001 دروست بوو، ئه‌وا ئیمڕالی زووتر دروستکرا‌، ئه‌گه‌ر له‌ گوانتانامۆ سه‌دان گیراو هه‌بوون، ئه‌وا له‌ئیمڕالی ماوه‌ی 14 ساڵ هیچ كه‌سێكی لێ نه‌بوو جگە لە ١٥٠٠ سه‌رباز له‌ هێزی تایبه‌ت و پاسه‌وانه‌كان و كارمه‌ندانی زیندان، ئه‌وانیش هه‌موویان به‌شێكن له‌كادیرانی شه‌ڕی سایكۆلۆژی بۆ لە هێزخستنی رێبه‌ر ئاپۆ.

ئه‌ردۆغان به‌ رێكه‌وتنی له‌گه‌ڵ ده‌وڵه‌ت باخچه‌لی واتا رێكه‌وتنی ئه‌كه‌په‌ و مه‌هه‌په، هه‌روه‌ها گۆڕینی ده‌ستور بۆ سه‌رۆكایه‌تی و تاك حیزبی و جاڕدانی شه‌ڕ و پێداگری له‌سه‌ر دیكتاتۆریه‌ت، هه‌مانكات ئه‌و گۆشگیری و سیسته‌می ئه‌شكه‌نجه‌یەی له‌سه‌ر ئیمڕالی به‌ڕێوه‌ی ده‌بات، نیشانه‌ی ئه‌وه‌یه‌ كه‌ ئه‌ردۆغان له‌ده‌ره‌وه‌ی شه‌ڕ و ماڵوێرانی و كوشتن و بڕین هیچ رێگایه‌كی تری نه‌هێشتۆته‌وه‌.

له‌دیداری رێبه‌ر ئاپۆ له‌ 11ی ئه‌یلولی ساڵی پار گوتی؛ ئێوه‌ تێكۆشانی خۆتان به‌ڕێوه‌به‌رن و خه‌می منتان نه‌بێ، چونكه‌ من سه‌د ساڵی تریش لێربم كه‌س ناتوانێ بمخاته‌ ژێر كاریگه‌رییەوە. ئه‌م وته‌یه‌ پڕمانا و هێزی به‌رخودانه‌، چونكه‌ رێبه‌ر ئاپۆ چه‌ندین جار ئه‌وه‌ی گوتوه‌؛ من ئازادم، ئێوه‌ تێكۆشان بۆ ئازادی خۆتان بكه‌ن نه‌ك بۆ من، له‌بنه‌ڕتدا ئه‌و قسه‌یه‌ زۆر راسته‌، چونكه‌ رۆح و مێشك و هزری ئازادی ناتوانرێ زیندانی بكرێ، ئه‌وا ئێمه‌ین له‌ده‌ره‌وه‌ین، به‌ڵام له‌ راستیدا هزر و رۆح و مێشكمان زیندانی كراوه‌و ناتوانین بۆ ئازادی خۆمان و گه‌له‌كه‌مان ببینه‌ ئه‌و هێزه‌ی گۆڕانكاری و پێشكه‌وتن بئافرێنین و ئیراده‌و هێزی تێكۆشانبین.

نەک تەنیا وەفادارییەک بۆ ئەو دۆخە دەگمەن و بێ وێنەیەی ئافرێنەریی ڕێبەر ئاپۆ بەڵکو وەک کەسانێک کە هەڵگری هەمان بیر و باوەڕین گرنگە کە ئازادی هزر و رۆح و هه‌بوونمان بە ئازادی ئەوەوە ببینین و بیكه‌ینه‌ پێوانه‌ی ئازادی و شۆڕش و تێكۆشان، ئه‌مه‌ش واده‌كات داگیركه‌ری ئه‌ردۆغان و داعش و هێزه‌ كۆنه‌په‌رست و به‌كرێگیراوه‌كانی ناوخۆش سه‌رنه‌گوم بچن و گوانتانامۆی رۆژهه‌ڵاتی ناوینیش ئیمڕالی ببێته مۆزه‌خانه‌یه‌ك كه‌ سه‌ركه‌وتنی شۆڕشی ئازادی و دیموكراتی تێدا ئه‌نجامدراوه‌.‌‌

بابه‌تی په‌یوه‌ندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close
Close
%d هاوشێوەی ئەم بلۆگەرانە: